Sairagül Sauytbai künı keşe Abzal Qūspannyŋ advokattaǧynan bas tartatyny turaly video mälımdeme jariialaǧan edı. Endıgı özınıŋ qūqyǧyn Aiman Omarovanyŋ qolyna tapsyrdy. Osy uaqytqa deiın türlı videolar jariialap, Abzal Qūspanǧa renışın bıldırıp jürgen Sairagül Sauytbaidyŋ mūndai şeşım qabyldauyna ne sebep boldy? Mūnyŋ jauabyn būrynǧy advokaty Abzal Qūspannan da sūraudy jön kördık. Advokattyŋ qorǧaluşysyna degen ökpesı qara qazandai.
«Jasyratyny joq, Säule (Äbıldahanqyzy – red.) men Sairagüldıŋ jaǧdaiynda men tolyq Säulenıŋ jaǧyndaǧy adammyn. Öitkenı, Säulenıŋ eŋbegıne, yntasyna kuämın. Eŋ bastysy, adamda köŋıl degen bolady ǧoi. Ony jaqsy bılemın. Sol üşın kezınde Sairagülge «mūnyŋ adamgerşılıkke jatpaidy» dep renışımdı aitqan edım. Ärı özıne tıkelei «sen menıŋ advokattaǧymnan özıŋ bas tartpasaŋ, men senı osŋyna deiın qorǧaimyn» dep aitqanmyn. Bıraq qatty renjıgenımdı jasyrmadym. Soǧan bailanysty bolar dep oilaimyn, bılmeimın.
"Özı maǧan ökpem joq",- deidı. "Bastapqy kezderde telefon kötermedıŋ" dep renjıdı. Sol kezde men Sairagülge: «Köz aldyŋa elestet, qyzyŋ Ükılıai o dünielık bolsa, eşteŋe bolmaǧandai jūmys ıstep, telefonmen söilesıp otyra alasyŋ ba?» dedım. Al men Sairagüldıŋ bır de bır sotyna, bır de bır jinalysyna barmai qalmaq tügılı, keşıgıp körgen adam emespın. Bärın uaqytyly üilestırıp jürdım. Al qaŋtardyŋ 4 künı respublikalyq köşı-qon komitetınen qanaǧattandyrmau turaly jauap aldym, "sotqa şaǧym jazamyn" dedım. Auyr qazaǧa tap bolǧanyma qaramastan Sairagüldıŋ mäselesı jönınde talap-aryz jazyp, sotqa tırkettım. Sol kezde ol halyqqa video mälımdeme jasaidy. Aitqany – Abzal Qūspan men habarlasqanda kötermedı. Ärine, aşulandym. Talap-aryzymdy äkeldım sotqa. Sonda Sairagül keşırım sūrap, qaitadan menıŋ qorǧauymdy ötındı. Kelıstım. Negızı, qatty renjıgenmın.
15 aqpan sot boluy tiıs. Endı qazaq degen köŋılı aşyq qoi, auyr qazaǧa duşar bolsaŋ, köŋıl şaiǧa şaqyrady. Söitıp 12 aqpan köŋıl şaiǧa baryp, dastarhan basynda otyrsam, Sairagül habarlasty. Tūtqany köterıp, keiın habarlasatynymdy, qolymnyŋ bos emestıgın aittym. Ol sot turaly sūrastyryp, habarlama jazyp jıberıptı. Men 15 aqpan bolatynyn aittym. Söitsem, "sot bolyp ketıptı" deidı, al onda ekeumız de bolmadyq. Būǧan alaŋdaǧan men sot bölımınıŋ hatşysyna habarlasyp edım, ol «eşqandai özgerıs joq, sot 15 aqpan bolady» dedı. Al men 14 aqpanǧa bilet alyp qoiǧan edım. Al ol taǧy video jariialap qoiypty. Taǧy renjıdım. Keşe tüskı uaqytqa deiın Sairagülmen telefon arqyly söilesıp jürdım, oiymda eşteŋe joq. Keşe Oraldan ūşaqqa otyryp, Astanaǧa ūşyp bardym, Astanadan taŋǧy saǧat 4-te Almatyǧa ūşyp keldım. Almatyǧa kelıp, älgı videony kördım.
Būl – balanyŋ oiyny ma, älde kürdelı oiyndar jürıp jatyr ma, bılmedım. Menıŋ bıletınım, men aşyq auyz, aŋqau advokat ekenmın.
Amal joq, 3000 şaqyrym jerdı artqa tastap kelgen soŋ, Taldyqorǧanǧa bardym. Bardym da közıne qarap bärın aittym. Maǧan talaby bar ma, aitary bar ma, bärın sūradym. «Joq» deidı. Aşulanamyn, ärine.
Söitıp, Aiman Omarovaǧa sättılık tıledım de, qaityp baramyn. Būl ıstı osymen tämamdadym. Men oiynşyq emespın ǧoi», - dedı Abzal Qūspan Qamshy.kz aqparat agenttıgınıŋ tılşısıne.
"Qamshy.kz "
