Mäjılıstıŋ jalpy otyrysynda deputat Däulet Mūqaev köpbalaly otbasylar tar üide tūruǧa mäjbür ekenın, memlekettık baǧdarlamalardyŋ talabyn qaita qarau kerektıgın aitty, dep habarlaidy "Adyrna" ūlttyq portaly.
Ol deputattyq saualyn Premer-ministrdıŋ bırınşı orynbasary Roman Skliarǧa joldady.
«Halqymyzdyŋ «Ūly dala kvartiranttary» atanǧany da janǧa qatty batady. Üisız-küisız jürgen qazaqstandyqtardy qoljetımdı jäne sapaly baspanamen qamtamasyz etetın memlekettık baǧdarlamalar qoljetımdı bolmai tūr. Bügınde tūrǧyn üi baǧytyndaǧy memlekettık baǧdarlamalar halyqtyŋ sūranysyn qanaǧattandyrmai otyr», - dedı deputat.Onyŋ paiymdauynşa, «Nūrly jer» baǧdarlamasy aiasyndaǧy «Baqytty otbasy» jäne «Şaŋyraq» baǧdarlamalarynyŋ talaptaryna özgerıs engızu kerek.
«Baqytty otbasy» baǧdarlamasy Qazaqstanda 2019 jyldan berı jüzege asyrylyp keledı. Jyl saiyn biudjetten 50 mlrd teŋge töŋıregınde aqşa audarylyp, 8 myŋǧa juyq otbasy üilı boldy. Baǧdarlama aiasynda maksimaldy nesieleu somasy aimaqtar boiynşa (Almaty, Astana, Şymkent, Atyrau, Aqtau) maksimaldy soma 15 mln teŋgege teŋ edı. 2019-2020 jyldary būl aqşaǧa 2 bölmelı üi aluǧa mümkındık bolsa, qazır päter baǧasy öskennen tek 1 bölmelı üi aluǧa mäjbür», - dedı Däulet Mūqaev.Sözınşe, qazaqstandyqtar «7-20-25» baǧdarlamasy boiynşa baspana alu üşın bankterdıŋ alynda tünep jatyr.
Baǧdarlama ūiymdastyruşylary «aqşa bar, bärı jaqsy, baǧdarlama jūmys ıstep tūr» dep körsetedı. Qazır «7-20-25» baǧdarlamasy boiynşa Qazaqstanda bırde-bır bank ipoteka bermeidı? Sebebı mausym saiyn limit qoiyp qoiǧan. Halyq bankterdıŋ aldynda tüneuge mäjbür. Būl tūrǧyda «7-20-25» baǧdarlamasy boiynşa limittı alyp tastau kerek. Baǧdarlama 2029 jylǧa deiın sozylady. Degenmen oǧan deiın aty bar da zaty joq baǧdarlamaǧa ainaluy äbden mümkın. Myŋdaǧan adam bankten maqūldau alǧanymen, limit kesırınen üidıŋ kıltın ala almai jür, - deidı ol.
