“Qytai qaptaidy”, “qytai jaulaidy” degen jazbalar feisbukte qaptap ketıptı. Ol keşe şyqqan “Qazaqstan men Qytai azamattary 30 kün vizasyz jüre alady” degen aqparatqa bailanysty jazyluda.
Al mäselege basqa qyrynan üŋılıp qarasaq, eşqandai da qytai qaptamaidy. 2022 jyly bız “Qytai azamattary 14 kün vizasyz jüre alatyn” özgerıs engızgenbız. Bır jylǧa juyq uaqyt boldy, qaptaǧan qytai körmedım. Däl sol siiaqty bolady.
Qytaidyŋ jalpy bızdıŋ azamattar üşın 30 kün vizasyz rejimge rūqsat etkenı jaqsy jaŋalyq. Qytai elşılıgınıŋ aldynda viza aluǧa tızılıp kezek tūratyn. Qytaidan kelgen qandas dostarym jeterlık, solardyŋ tuystary, tanystary viza alu üşın ailap qūjat jinap jüretın. “Ana jerden anyqtama äkel, myna jerden qūjat äkel” dep şapqylaityn. Al endı mynau ol azamattar üşın jaqsy jaŋalyq qoi. Altaidyŋ arǧy betındegı qandasqa da tiımdı. Onyŋ üstıne Qytaiǧa demaluǧa, medisinasy jaqsy bolǧandyqtan em aluǧa baratyndar da jetkılıktı. Olar üşın de äure-sarsaŋ azaidy. Eŋ tiımdısı käsıpkerlerge dep oilaimyn. Ötken jyly Qazaqstan-Qytai sauda qatynasy alǧaş ret Reseidı artta qaldyrdy. Iаǧni bız üşın Qytai basty ekonomikalyq, sauda qatynastaǧy serıkteske ainaldy degen söz. Qytaiǧa kırıp, käsıp jasap, tabys közın ızdep, şapqylap jürgen jandarǧa uaqyt jaǧynan da, qarjy jaǧynan da tiımdı boldy deuge bolady.
Sondyqtan mäselege osy qyrynan da qarau kerek. Emosiiany jiyp qoiyp, būl jaŋalyqqa Qytaiǧa kıru üşın viza aluǧa taban tozdyrǧan qazaqtyŋ közımen de qarau kerek.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz