Astanada til basqarmasyn jabý ne úshin kerek boldy, buǵan kim arasha túse alady?!
Eldi oılaıtyn erteńshil ákim dep maqtaǵan Baqyt Sultanovtyń búgingi sheshimi shynymen jaǵa ustatty. Elordamyzda memlekettik til máselesi sheshilip qoıǵandaı, endi til basqarmasy derbes mekeme retinde jumys istemeıtin bolypty. Bul ákimniń de til degende tiksinip qalatynyn kim bilgen.
Sultanovtyń sheshimine sáıkes Astanadaǵy qoǵamdyq-ıdeologııalyq jumysty endigide jańa qurylǵan Qoǵamdyq damý basqarmasy júrgizedi.
Bul mekemege qoǵamdyq damý basqarmasy, mádenıet jáne sport basqarmasy, tilderdi damytý jáne arhıv (muraǵat) isi basqarmasy biriktiriledi. Ákimniń bul ekonomıkalyq turǵyda paıdaly, qarjy únemdeledi degenin estip jatyrmyz. Áıtsede til máselesinde, ıdeologııa salasynda, ásirese ulttyq sana quldyraǵan qazirgi kezeńde únem degendi aıtýdyń ózi jaýyzdyqpen para-par.
Soltústik aımaqtardy aıtpaǵannyń ózinde, qaımaǵy buzylmaǵan Túrkistan jáne Jambyl oblystarynda til basqarmalary jumys istep keledi. Endeshe Astanaǵa ne joryq?
Tilderdi damytý basqarmasynyń arqasynda Astana qazaqylanyp kele jatqan. Orazkúl Asanǵazy, Erbol Tileshov, Tileýǵalı Qyshqashbaevtardyń bastamasymen qala kósheleri, aýdandaryna qazaqsha ataýlar berilip, saýda ortalyqtary men ǵımarat mańdaıshalaryndaǵy ataýdy qazaqsha saýatty jazý jumystary qadaǵalana bastaǵan. Til basqarmasyna júrekti azamattar jumysqa alynyp, eriktiler toby qurylyp, Astanada til tazalyǵyn talap etýshi jastar kóbeıgen. Rýhanııat ortalyǵy ashylyp, ult úshin mańyzdy is-sharalar ótkizile bastaǵan.
Til mártebesi – el mártebesi. Elbasynyń aýzymen aıtsaq: Tilge degen kózqaras – shyndap kelgende, elge degen kózqaras. Qazaq tili – Qazaqstan Respýblıkasynyń memlekettik tili. Oǵan kóńil de, qarjy da solaı bólinedi,- dep málimdegen de memleket basshysy Nursultan Nazarbaev. Budan asyp qalaı aıtýǵa bolady. Túsingen adamǵa bul jáı sóz emes tapsyrma. Sondyqtan Sultanovtyń búgingi sheshimin asyǵys jasalǵan qadam dep sanaımyn. Basqadan únemdese de tildik, ulttyq máseleden únemdeýdiń keregi joq. Ásirese áleýmettik máseleler ýshyqqan qazirgi kezeńde.
Til – ulttyń súıenetin túp tamyry. Endeshe tilderdi damytý basqarmasyn derbes mekeme retinde saqtap qalýǵa áli de bolady dep senemin. Kóp túkirse kól degen. Eldigimizdi bildireıik, el bolyp talap eteıik.
Mádı Manatbek
