Túrkııanyń Ystambul qalasynda Tehnofest aeroǵarysh jáne tehnologııalyq festıvali ótti. Bıyl aıtýly shara Túrkııa Respýblıkasynyń qurylǵanyna 100 jyldyǵyna arnaldy.
Tehnofesttiń negizgi maqsaty óskeleń urpaqtyń tehnologııaǵa degen qyzyǵýshylyǵyn arttyrý ári Túrkııany tehnologııany óndiretin jáne damytatyn el retinde álemge tanytý.
Sharaǵa qatysýshy ári ony uıymdastyrýshylardyń biri - Túrik áskerı áýe tehnıkalaryn óndirýshi Seljúk Baıraktar Tenhofesttiń kókjıegi jyldan jylǵa keńeıip kele jatqanyn aıtty.
Seljúk Baıraktar, Baykar Makina kompanııasynyń tehnıkalyq dırektory:
«Tehnofest Táýelsiz Túrik eliniń jobasy. Festıvaldiń bolashaǵy bar. Bıyl biz altynshy ret uıymdastyryp jatyrmyz. Ótken jyly Ázirbaıjanda ótkizgen bolatynbyz. Al keleshekte baýyrlas elderde uıymdastyratyn bolamyz. «Qyzyl alma» dep atalatyn áskerı áýe apparatymyzdan keıin ushatyn kólik jáne ǵarysh apparattaryna den qoıýýymyz múmkin. Bul qazirgi zaman talaby» dedi.
Bıylǵy festıvaldegi kórmege azamattyq jáne áskerı áýe tehnıkanyń túr-túri qoıylǵan. Munda ushaqtyń, tikushaqtyń jáne ushqyshsyz basqarylatyn tehnıkalardyń ondaǵan birligi kópshilikke tanystyryldy. Ásirese ańyzǵa aınalǵan «Baıraktar» ushqyshsyz áskerı áýe apparatyna kóptiń qyzyǵýshylyǵy joǵary. Al ony qurastyrýshy Seljúk Baıraktar bolashaqta Qazaq elinde de mundaı festıvaldiń ótýi múmkin dedi.
«Bizdiń festıval mamyrdyń basyna deıin jalǵasady. Baýyrlas Qazaq elin osy jerden kórgim keledi. Biz túbi bir elmiz. Al, keleshekte eki eldiń jarqyn bolashaǵy úshin Tehnofesti birigip Sizdiń elde de uıymdastyrýǵa bolady» dedi ol.
Iri avıaııalyq shoýǵa ásirese stýdenttermen mektep oqýshylarynyń qyzyǵýshylyǵy zor. Sondyqtan olar osy kúnderdi jyl boıy kútemiz deıdi.
Ǵylym men tehnologııalyq óndiriske arnalǵan mereke 28 sáýir men 1 mamyr aralyǵynda Ystambuldyń Atatúrik áýejaıynda, al Ankarada 30 tamyz ben 3 qyrkúıek aralyǵynda ótpek.
Ǵanı ÓTEPBAIULY, Ystambul
