Jazýshy-dramatýrg Dýman Ramazan Qazaqstan jazýshylar odaǵynyń tóraǵalyǵyna óz kandıdatýrasyn usynǵan jazbasymen bólisti, dep habarlaıdy "Adyrna".
Dýman Ramazan óziniń Facebook paraqshasynda nelikten ózin tóraǵalyqtan kóretinin málimdedi.
Ol birneshe krıterııler kórsetip, elimizdegi jazýshy, ádembıetshilerdiń shyǵarmashylyǵyn shyńdaýǵa qajet baǵyt-baǵdardy atap ótti:
"Jazýshylar odaǵynyń ǵımaraty bar, ondaǵy jalǵa beriletin bólmeler bar, jıyn ótkizetin keń zaly bar, Shyǵarmashylyq úıi bar, memlekettik tenderlerden túsetin qarjy-qarajat bar, eger istiń ebin tapsa, ózin-ózi aqtaıdy dep oılaımyn. Odaqqa túsken ár tıynnyń ornymen jumsalýyn qatań qadaǵalap, erekshe baqylaýda ustasa, ońdy-soldy shasha bermese, kóp nárse tyndyrýǵa bolady. Jyl saıyn odaqtyń kiris-shyǵysyn eseptep, esep berip otyrsa, jurtshylyqta da eshqandaı kúdik-kúmán týmaıdy. Zamanǵa saı bári ashyq bolýy kerek. Túkke qajeti joq jıyndardyń barlyǵyn qysqartyp, nemese basqasha, jańasha formatta ótkizýdi oılastyryp, jańasha jumys isteýge kóshý kerek. Bul jaǵynan alǵanda da isteımin degen adamǵa Qazaqstan Jazýshylar odaǵynda múmkindik mol" dep jazdy ol.
Pikirler bóliminde birshama zııaly qaýym ókilderi, qoǵam belsendileri Dýman Ámirǵalıulyn qoldap, tóraǵalyq qyzmetke ábden laıyq kórip otyr.
"Adyrna" ulttyq portaly
