Búgin Astanada kvazımemlekettik sektorynda áıel basshylardy daıarlaý boıynsha «Genderlik teńdik» baǵdarlamasynyń bitirý rásimi ótti. «Samuryq-Qazyna» AQ kompanııalar tobynyń bul oqý jobasy Qazaqstan Respýblıkasynyń Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen qurylǵan jáne kvazımemlekettik sektoryndaǵy kompanııalar men uıymdardyń basqarýshy organdarynda áıelderdiń úlesin arttyrýǵa baǵyttalǵan.
Joba QR Prezıdentiniń memleket qatysatyn kompanııalardaǵy basshylyq laýazymdardaǵy áıelderdiń 30%-dyq ókildigi týraly tapsyrmasyn iske asyrý tetikteriniń birine aınaldy.
Saltanatty rásimde Prezıdent Ákimshiligi Basshysynyń orynbasary, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva:
«Ulttyq komıssııa qoǵamdyq negizde jumys isteıtin jáne belgili bir salanyń damýyna jáne qoǵamnyń ózekti máselelerin sheshýge úlken úles qosatyn óte belsendi jáne perspektıvaly áıelderden turady.
Búginde Áıelder qozǵalysy jańa jarqyn ókildermen jáne kóshbasshylarmen tolyqtyrylýda. Sizderdiń árqaısyńyzdyń qazaqstandyq qoǵamdaǵy áıelderdiń jaǵdaıyn jaqsartýǵa yqpal etetin óz ıdeıalaryńyz, bastamalaryńyz, jobalaryńyz bar ekenine senimdimin. Meniń oıymsha, áıelderdi ártúrli kompanııalardyń Dırektorlar keńesine qosýdy kózdeıtin búgingi jobamyz biregeı»,- dep atap ótti.
«Samuryq-Qazyna» basqarma tóraǵasy Nurlan Jaqypov óz sózinde: «Búgin kompanııalardy basqarýǵa baǵyttalǵan tásilderdi jetildirýdiń óte mańyzdy kezeńin aıaqtap otyrmyz. Bizde sheshim qabyldaý deńgeıinde jumys isteýge daıyn áıelder pýly bar. Bizdiń kóshbasshylardy daıarlaý tájirıbemiz búkil elge paıdaly bolatynyna senimdimin jáne biz ony bólisýge daıynbyz»,- atap ótti.
Búgingi tańda «Samuryq-Qazyna» tobynda 259,5 myń adam, onyń ishinde 72 myń áıel jumys isteıdi. 8,5 myńǵa jýyǵy bólim bastyǵy laýazymynan bastap basshylyq laýazymǵa deıin qyzmette. Bul jalpy basshylar sanynyń shamamen úshten bir bóligi. Degenmen joǵary basshylyqta (basqarmalar, dırektorlar keńesteri, baıqaý keńesterinde) áıelderdiń úlesi tek 15%.
Bul kórsetkishti 2023 jyly 20%-ǵa deıin jáne 2030 jylǵa qaraı 30%-ǵa deıin arttyrý boıynsha qadamdar qabyldanýda. Osyǵan baılanysty áıelder kóshbasshylyǵy daǵdylaryn qalyptastyrý, áıel kóshbasshylardy yntalandyrý jáne ilgeriletý, genderlik teńdik basymdyqtaryna qol jetkizý jónindegi ortany damytý úshin jaǵdaılar jasalady.
Osy mindetterdi iske asyrýdyń tıimdi quraldarynyń biri «Genderlik teńdik» baǵdarlamasy boldy. «Genderlik teńdik» baǵdarlamasynyń arqasynda Qazaqstannyń túkpir-túkpirinen basqarýshylyq tájirıbesi bar «Samuryq-Qazyna» kompanııalar tobynyń qyzmetkerleri memlekettik kompanııalardyń dırektorlar keńesteri men baıqaý keńesteriniń quramyna kirý úshin menedjmenttiń qosymsha kýrstarynan ótti. Búgin 71 áıel kýrsty aıaqtap, sertıfıkat aldy. 15 túlek ortalyq memlekettik organdar, áıelder isteri jáne otbasylyq-demografııalyq saıasat jónindegi óńirlik komıssııalar janyndaǵy saraptamalyq toptarǵa engizilgen. Taǵy 10 qatysýshy memlekettik kompanııalardyń basqarý organdaryna qabyldandy.
