Qazaqstan prezidentı Nūrsūltan Nazarbaev Halyqaralyq äielder merekesı (8 nauryz) qarsaŋynda bır top qazaqstandyq äieldermen kezdestı. 7 nauryzda Aqordadaǧy kezdesude prezident köp balaly otbasylarǧa kömek körsetu turaly aitty, dep habarlaidy Qazaqparat.
"Kömekke mūqtaj analar men balalarǧa kelesı aidan [järdemaqy] beresıŋder dep keşe tapsyrma berdım. Kömek pen qamqorlyq ärdaiym eselenıp, arta beredı. Bıraq qazırgı naryq zamanynda qol jaiyp, ükımetten kömek sūrauǧa beiımdelmeuımız kerek" degen Nazarbaev.
Ol "bärın ükımet beredı" dep sovet kezındegıdei otyra beruge bolmaitynyn aitqan.
"Sol kezde bala tuǧannan keiın tegın balabaqşaǧa alady, sodan keiın mektepke, oqudy bıtırgen soŋ jūmys beredı. Qazır ondai zaman joq. Ol kezde memleket eldıŋ tapqanyn jinap alyp, bärıne bölıp otyratyn. Qazır ärkım öz tabysyn özı paidalanatyn kezde neşe bala bolatynyn, ony qalai asyrau kerek ekenın, oquy bar - sonyŋ bärın oilanu kerek" degen prezident.
Aqordadaǧy kezdesude Nazarbaev auyl halqynyŋ jaǧdaiyn jaqsartudy közdeitın "Auyl - el besıgı" tärızdı jobalar bolǧanyna qaramastan auyldan qalaǧa köşıp kelıp, uaqytşa baspanada tūryp jatqandar turaly da aitqan.
"Qalaǧa kelıp jatyr, baspana joq, jūmys joq. Qala ırgesınde sandalyp jüredı, ondai jerde neşe türlı bolady. Saiajaidy, saraidy jaldap tūrady. Ärine, ony jylytqysy keledı. Bıraq bızdegıdei aiazda jyryǧy köp saraidy qalai jylytasyŋ?" degen prezidenttıŋ sözın keltırgen Tengrinews.
Nazarbaev äieldermen kezdesude Qazaqstanda ajyrasu jiılep ketkenıne qynjylatynyn aitqan. Onyŋ sözınşe, elde nekege tūrǧandardyŋ 20 paiyzy keiın ajyrasyp ketedı.
4 aqpanǧa qaraǧan tünı Astananyŋ Köktal-1 şaǧyn audanynda jeke üidıŋ aulasyndaǧy uaqytşa baspana örtenıp, bır otbasyndaǧy 2006, 2008, 2013, 2015 jäne 2018 jyly tuǧan bes qyz bala opat bolǧan edı. Osy oqiǧadan keiın elde analar narazylyǧy küşeiıp, Qazaqstanda köp balaly otbasylarǧa memleket qamqorlyǧyn küşeitu turaly talaptar aityla bastady.
27 aqpanda özı basqaratyn bilık partiiasynyŋ sezınde Nazarbaev aldaǧy üş jylda elde äleumettık jaǧdaiy tömen otbasylardy qoldauǧa qosymşa 300 milliard teŋgeden astam aqşa bölınetını turaly mälımdegen.
"Azattyq" radiosy
