Almatyda 2 paiyzben ipoteka berıledı: Qūjat qabyldau merzımı ataldy

Almaty äkımı Bauyrjan Baibek Memleket basşysynyŋ "Nūr Otan" partiiasynyŋ XVIII sezınde aitylǧan halyqtyŋ az qamtylǧan tobyna, onyŋ ışınde köpbalaly analarǧa qoldau körsetu jönındegı tapsyrmasyn oryndau boiynşa qalalyq jospardy tanystyrdy. Megapolis basşysy ol üşın jergılıktı biudjetten 5,5 mlrd. teŋgeden astam qarjy bölınetının atap öttı, - dep habarlaidy Tengrinews.kz tılşısı Almaty äkımdıgınıŋ baspasöz qyzmetıne sılteme jasap. "Memleket basşysy atap ötkendei, ärbır qazaqstandyq otbasy reforma nätijesın bolaşaqta emes, däl qazır sezınulerı tiıs. Az qamtylǧan azamattardyŋ tabysyn köteru, baspanaǧa, sapaly bılım men densaulyqqa qoljetkızulerı jäne öŋırlerdı damytu üşın Prezident qosymşa 2 trillion teŋge böludı tapsyrdy. Prezident alǧa qoiǧan äleumettık mäselelerdı sapaly oryndau üşın Almatyda naqtyly şaralar jospary, onyŋ ışınde "Baqytty otbasy" qalalyq äleumettık baǧdarlamasy jasaldy. Būl - jeŋıldetılgen tūrǧyn üi ipotekasy, oquşylar men studetterdıŋ stipendiiasy, äleumettık jäne bırrettık tölemder, jūmyspen qamtu jäne basqalary. Jalpy, halyqtyŋ az qamtylǧan tobyna, onyŋ ışınde köpbalaly otbasylarǧa keşendı qoldau körsetu üşın 5,5 mlrd. teŋgeden astam qarjy bölınedı", - dedı Bauyrjan Baibek. Endı 11 nauryzdan bastap "Baqytty otbasy" arnaiy qalalyq tūrǧyn üi baǧdarlamasy boiynşa qūjattar qabyldanady. Alǧaşqy jarna tūrǧyn üi qūnynyŋ 10 paiyzyn qūraidy, mölşerleme - 2 paiyz. Kezekte tūrǧan 1276 köpbalaly jäne tolyq emes otbasylardyŋ alǧaşqy jarnany töleuge qarajattary joq bolǧandyqtan qala biudjetınen 1 million teŋgenıŋ tūrǧyn üi sertifikattary bölınedı. Almatynyŋ köpbalaly otbasylary üşın ekınşı balasynan bastap bala baqşa tegın bolady. 20 nauryzdan bastap az qamtylǧan otbasylardyŋ 4 myŋǧa juyq oquşylaryna alǧaş ret stipendiia tölenedı. Mektep oquşylary ai saiyn 5 myŋ teŋgeden, al universitetter men kolledjder studentterı 10 myŋ teŋgeden alady. Qiyn jaǧdaiǧa duşar bolǧandarǧa berıletın bırrettık tölem kölemı 25 myŋnan 50,5 myŋ teŋgege köbeiedı. 15 nauryzdan bastap järdemaqy kölemı artyp, 5 myŋǧa juyq adamdy qamtidy. 15 nauryzdan bastap az qamtylǧan otbasylarǧa ystyq jäne suyq su eseptegış qūraldaryn jeke ornatuǧa berıletın järdemaqy kölemı 70 paiyzǧa nemese 5 myŋnan 8,6 myŋǧa ösedı. Būlardan özge, az qamtylǧandar tobyna kommunaldyq qyzmetke ketetın şyǧynnyŋ ornyn toltyru üşın berıletın järdemaqy kölemı 5 paiyzǧa deiın artady. 1 nauryzdan Almatydaǧy jūmyssyz analardy oqytu jäne käsıbi daiyndau şaralary bastaldy ärı olarǧa 16,7 myŋ teŋge kölemınde stipendiia berıledı. Qalada jastar praktikasy, subsidiia bölıp jūmyspen qamtu, jalaqysy 63 myŋ teŋgelık äleumettık jūmysqa tartu şaralary ūiymdastyryluda. Bır tereze qaǧidasy boiynşa jūmys jasaityn köpbalaly analar Ortalyǧynda qūqyqtyq jäne psihologiialyq keŋester berıledı, reabilitasiialyq kömek körsetıledı, ortalyq 1 säuırden bastap esıgın aşady. Mūnda köpbalaly analar eŋbekpen qamtylady, mini - bala baqşalar ūiymdastyrylady. Qalalyq Äleumettık äl-auqat basqarmasynyŋ basşysy Rahat Şimaşeva megapoliste "Nūrly jer" baǧdarlamasy boiynşa jalǧa berıletın, onyŋ ışıne köpbalaly otbasylar da kıredı, 40 myŋnan astam päterler qūrylysy bastalatynyn aitty. Atauly äleumettık kömek kölemın kün körıs körsetkışınen 70 paiyzǧa deiın köteru barysynda Almatyda ony alatyndar sany 2 699 dan 4000 adamǧa östı. Mügedek balalardy tärbieleuşılerge berıletın tölem kölemı 31,1 myŋnan 41,6 myŋǧa artty. Būl şara 7 394 adamdy qamtidy. Memleket basşysynyŋ tapsyrmasy boiynşa Almatynyŋ biudjettık salasyndaǧy 30 myŋnan astam qyzmetkerlerdıŋ jalaqysyn 30 paiyzǧa deiın köteru josparlanǧan