15 mamyr künı, R.B. Süleimenov atyndaǧy Şyǧystanu institutynyŋ bas direktory, filologiia ǧylymdarynyŋ doktory, professor, äigılı aqyn, audarmaşy, körnektı qytaitanuşy-ǧalym, Qazaqstannyŋ eŋbek sıŋırgen qairatkerı, «Parasat» ordenınıŋ jäne «Alaş» halyqaralyq ädebi syilyǧynyŋ iegerı Düken Mäsımhanūlynyŋ 60 jyldyq mereitoiyna orai Jambyl atyndaǧy qalalyq jasöspırımder kıtaphanasynyŋ oqyrmandarymen «Azattyǧym men qazaqtyǧym» atty kezdesu öttı. Kezdesudı kıtaphananyŋ meŋgeruşısı B.Q. Däuletbaeva saltanatty aşyp berdı.
Şaraǧa tarih ǧylymdarynyŋ doktory, professor, Qazırgı zamanǧy Qytaidy zertteu ortalyǧynyŋ direktory N. Mūqamethanūly, ädebiettanuşy, synşy, Düniejüzı qazaq qauymdastyǧy Almaty bölımşesınıŋ bastyǧy O.Ädılbekūly, täuelsız jurnalist Ä.Äşımūly, R.B. Süleimenov atyndaǧy Şyǧystanu institutynyŋ ǧylymi qyzmetkerı Q. Qadylǧazy, äl-Farabi atyndaǧy Qazaq Ūlttyq universitetınıŋ doktoranty Ö.Seisenqūl jäne studentter, magistranttar men doktoranttar qatysty.
Kezdesudı aqyn, jurnalist Q. Jūmaǧūl jürgızıp otyrdy.
Alǧaş söz alǧan professor N. Mūqamethanūly mereitoi iesın tuǧan künımen qūttyqtap, Qazaqstan täuelsızdık alǧanda otanyna oralyp, Qazaqstanda qytaitanu ǧylymynyŋ damuy men qalyptasuyna zor eŋbek sıŋırgen, jüzdegen şäkırt tärbielegen ūlaǧatty ūstaz ekenın atap öttı. «D.Mäsımhanūlynyŋ tärbielegen şäkırtterı bügınde ärtürlı jauapty joǧary memlekettık qyzmetterdı atqaryp jür» dedı. Öskeleŋ ūrpaqtyŋ bügıngı kezdesuden ruhani när alyp, ūlttyq ruhynyŋ ösetınıne senım bıldırdı.
Odan keiın söz alǧan O. Äbdıbekūly Düken Mäsımhanūlymen Beijıŋdegı Ūlttar universitetınde bır kursta oqyǧanyn, D.Mäsımhanūly qazırgı uaqytta qytaitanu ǧylymynyŋ qalyptasuy men damuyna qomaqty üles qosqan, şeşuşı röl atqarǧan ataqty ǧalym bolsa, student kezınde de jalyndy jyrlarymen qytai-qazaq jastarynyŋ arasynda öte tanymal aqyn boldy dedı.
Mereitoi iesın qūttyqtap söz alǧan täuelsız jurnalist Ä. Äşımūly «Dükeŋnıŋ qazaq elıne keŋınen tanymal boluyna äser etken faktordyŋ bırı – ädebiet. Ol äigılı aqyn, myqty audarmaşy, jazuşy. Öitkenı oǧan būl qasietter atasynyŋ qanymen, anasynyŋ aq sütımen kelgen» dedı.
Odan keiıngı söz keştıŋ qonaǧy, mereitoi iesı Düken Mäsımhanūlyna berıldı. Şetelde tuyp-ösken bolaşaq ǧalym, aqyn, audarmaşy alǧaş tarihi otany turaly qaşan jäne qalai kelgenın, Qazaqstan alǧaş täuelsızdıgın jariialaǧanyn qaida, qalai estıgenın jäne qandai äserde bolǧanyn qyzyqty etıp baiandap berdı. Tarihi otanyna oralǧan 30 jylda ǧylym jolyndaǧy ızdenısterı, ǧylymi eŋbekterı, aqyndyǧy, ūstazdyǧy jäne qytai tılınen körkem audarma jasauǧa qalai kelgenı turaly keŋınen äŋgımelep berdı. D.Mäsımhanūlynyŋ Otan turaly äŋgımelerı jastardyŋ otansüigıştık sezımderınıŋ oianuyna üsteme boldy. Sondai-aq ömırınde bolǧan qyzyqty estelıkterımen de bölıstı. Sözınıŋ soŋynda qonaqtar men öskeleŋ ūrpaqqa özınıŋ «Janşuaǧym – Otanym» atty poemasynan üzındı oqyp berdı.
Jiyn barysynda şarany jürgızuşı Qūrmanǧazy Jūmaǧūl keş qonaqtaryna arnap än men jyrdan şaşu şaşty.
Studentter men magistranttar keş qonaǧynyŋ şyǧarmaşylyǧy men ǧylymi eŋbekterı turaly özderın tolǧandyrǧan sūraqtaryn qoiyp, tolyq jauap aldy.
Şaranyŋ ūiymdastyruşysy Jambyl atyndaǧy qalalyq jasöspırımder kıtaphanasynyŋ meŋgeruşısı B. Qaişybekqyzy qonaqqa jarqyn kezdesu üşın alǧys aityp, jürekjardy tılegın bıldırdı.
Ūrpaq tärbiesı – ūlt bolaşaǧy desek, osyndai belgılı ǧalym, ūstazben kezdesudıŋ bolaşaq jas mamandarǧa berer önegesı mol, maŋyzy joǧary.
