Tarazda Qazaqstan Respýblıkasynyń altynshy Jazǵy Spartakıadasynyń saltanatty túrde resmı ashylýy ótti.
Ortalyq stadıonda ótken aýqymdy sharaǵa qurmetti qonaqtar jáne kópshilikpen birge QR Mádenıet jáne sport mınıstri Ashat Oralov, oblys ákimi Nurjan Nurjigitov qatysty.
Tarazdyń tereń tarıhy syr shertken «Kóne Taraz» beınerolıgi, «Babalar rýhy» daýylpazdar qoıylymdary jınalǵandarǵa erekshe áser syılady.
Budan soń ortaǵa spartakıadanyń týy shyǵaryldy.
QR Mádenıet jáne sport mınıstri Ashat Oralov tórt jylda bir ótetin sharanyń mańyzdylyǵyn atap ótip, barsha jınalǵandardy quttyqtap, qatysýshylarǵa sáttilik tiledi.
Sondaı-aq, mınıstr Memleket basshysynyń qoldaýymen búginde el sportynyń qarqyndy damyp kele jatqanyn, ol úshin barlyq tıisti jaǵdaılar jasalýda ekenin atap ótti.
- Qazaqstan Respýblıkasynyń Spartakıadasy - tórt jylda bir ret ótkiziledi. Búgingi jarysqa elimizdiń barlyq óńirinen 1000-nan astam sportshy qatysyp otyr. Bul baıraqty báseke el tarıhyndaǵy eleýli oqıǵa.
Spartakıadanyń negizgi maqsaty – Qazaqstan Respýblıkasynyń jazǵy sport túrleri boıynsha ulttyq qurama komandalaryna eń myqty sportshylardy jasaqtaý jáne halyqaralyq resmı jarystarǵa, onyń ishinde Parıjde ótetin 2024 jylǵy jazǵy Olımpıada oıyndaryna lıenzııalyq jarystarǵa qatysýǵa úmitkerlerdi anyqtaý.
Ózderińiz bilesizder, elimizde jastardyń sportpen jáne dene shynyqtyrýmen aınalysýy úshin barlyq jaǵdaı jasalyp, Prezıdenttiń tikeleı tapsyrmalarymen qoldaý taýyp keledi.
Sonyń nátıjesinde, el sportshylary nebir halyqaralyq dúbirli dodalarda top jaryp, ult abyroıyn asqaqtatyp júr. Olar óskeleń urpaqqa úlgi-ónege bolyp, jastardy jarqyn jeńisterge jeteleıdi.
Osy múmkindikti paıdalana otyryp, Spartakıadanyń ótkizýine erekshe qoldaý bildirgenderi úshin Jambyl oblysynyń ákimdigine, turǵyndaryna zor alǵysymdy bildiremin,-dedi Ashat Oralov.
Sondaı-aq, mınıstr jaqynda ǵana Tashkent qalasynda ótken bokstan álem chempıonatynda jeńiske jetken sportshylardyń jeke jattyqtyrýshylaryna Qazaqstan Respýblıkasynyń Prezıtenti Qasym-Jomart Toqaevtyń Qurmet gramotasyn tabystady.
Al Jambyl oblysynyń ákimi Nurjan Nurjigitov tórt jylda bir ótetin sharanyń saltanatty ashylýy kıeli Taraz tórinde ótýi mereıli mártebe ekendigin jetkizdi.
- Sport – densaýlyqtyń kepili, dostyqtyń berik tutqasy. Deni saý jastarymyz – egemen elimizdiń erteńgi tiregi, tutqasy! Bul baǵytta óńirimizde kóptegen aýqymdy sporttyq sharalar uıymdastyrylýda.
Búgingi 4 jylda bir ótetin dástúrli Spartakıadanyń basty maqsaty – buqaralyq sportty damytý, salaýatty ómir saltyn qalyptastyrý, dene shynyqtyrý men sportty nasıhattaý.
Spartakıadanyń ashylý saltanatynyń kıeli Jambyl jerinde ótýi biz úshin zor maqtanysh, mereıli mártebe.
Taraz topyraǵy – talaı talantty sportshylardyń tomaǵasyn sypyryp, túletken qasıetti meken. Bul turǵydan biz olımpıada juldyzdarymen maqtana alamyz, olardyń jeńisti joly – jas urpaqqa úlgi.
Búgingi sporttyq sharaǵa qatysýshy barlyq sportshylar men jattyqtyrýshylarǵa sáttilikter tileımin,-deı kele oblys ákimi spartakıadany ashyq dep jarııalady.
Budan soń spartakıadanyń alaýy jaǵylyp, tóreshi, sportshy, jattyqtyrýshylardyń ant berý rásimi ótti.
Saltanatty shara estrada juldyzdarynyń jáne jergilikti ónerpazdardyń qatysýymen konerttik baǵdarlamaǵa jáne merekelik otshashýǵa ulasty.
"Adyrna" ulttyq portaly
