Mäsımov qandai kıtap jazbaq?

Jūrt jylap-syqtap jürgende, Mäsımov Elbasy turaly kıtap jazbaq. Künı keşe ǧana Qazaqstannyŋ Prezidentı auysyp, onymen qosa qala, köşe ataularynyŋ da auysyp jatqanyn estıp-körıp otyrsyzdar. Jaŋa prezident - Senattyŋ būrynǧy spikerı Qasym-Jomart Toqaev. Ol keşe el-halyqtyŋ aldynda ant qabyldap, qos palata deputattary men Ükımet müşelerınıŋ, tıkelei efirde tamaşalaǧan milliondaǧan adamnyŋ aldynda ataq-marapat berıp, eks-prezidentke, özınıŋ saiasi ūstazyna syi-qūrmetın de körsetudı ūmyt qaldyrǧan joq. Būl turaly aityldy, jazyldy. Qaitalap jatpaiyq. Parlamenttıŋ deputattar men Ükımettegı ministrler Nūrsūltan Nazarbaevpen qimai-qimai qoştasty. Közderıne jas aldy. Keibıreulerı tıptı telekamera aldynda köz jasyna ie bola almady da. Bızdıŋ aitpaǧymyz da ol emes. Nūrsūltan Nazarbaev prezidenttıkten ketkenımen, elden ketken joq qoi. Ol Qauıpsızdık keŋesın, bilıktegı dominant partiia sanalatyn Nūr Otandy tızgındep qaldy. Al onyŋ qyzy Dariǧa Nūrsūltanqyzy Senattyŋ spikerı bolyp taǧaiyndaldy. Senattaǧy 44 deputat qatysqan jasyryn sailauda 44 deputattyŋ dauysyn tügel iemdengen Dariǧa Nazarbaeva Senatty tızgındep, eldegı ekınşı tūlǧaǧa ainalyp şyǧa keldı. Soŋǧy ekı-üş künnen bergı eldegı bolyp jatqan saiasi prosessterdıŋ jyldamdyǧy sonşalyq, jūrt qorytyp ülgere almai da qaldy. Al özın Nūrsūltan Nazarbaevtyŋ kömekşısı sanaityn Kärım Mäsımov ol turaly kıtap jazatynyn mälımdedı. Bügın sol kıtap turaly, sol kısı turaly söz etpekpız. İä, Qazaqstannyŋ būrynǧy Ükımetbasşysy, qazırgı Ūlttyq qauıpsızdık Komitetınıŋ basşysy – Kärım Mäsımov eks-prezident Nūrsūltan Nazarbaev turaly kıtap jazady. Özı solai dep mälımdegen. Ony «bnews.kz» saity süiınşı sūraǧandai qylyp habarlady. Kärekeŋ, özınıŋ kıtap jazatyny turaly Parlament kuluarynda mälımdegen. Bır bılsek, ol kıtaptyŋ jasyryn betterı bolatyn körınedı. «Nūrsūltan Äbışūly – ol Ūly adam. Ol turaly «Elbasy – kömekşınıŋ közımen» atty kıtap jazamyn. Jasyryn betterı bar, öte qyzyq kıtap bolady», deptı dälırek aitsaq. Solai, mıne. Ol neǧylǧan jasyryn better ekenı bızge de qyzyq, ärine. Mäsımov intriga jasaudyŋ mästırı bolyp alǧan ba, qalai dedık jäne. Söitıp, keşe Qasym-Jomart Kemelūly ant qabyldap, prezidenttık qyzmetıne kırıstı. Al Täuelsızdık alǧan jyldardaǧy alǧaşqy prezident Nūrsūltan Nazarbaev saiasi yqpalyn saqtai otyryp, qyzmetın bosatty. Nazarbaev prezidenttıkten ketkende İsimbaev, Äitımova, Peruaşev, Tıleuhanov qatarly deputattar tıkelei efirde-aq, jylap qoia berdı. Güljan Qaraqūsova bolsa, Nazarbaevty äkesıne teŋedı. Ministr Abaev özın jetım qalǧan baladai sezınetının aitty. Jūrt aityp jatqanda, Kärekeŋ jazbaqqa bel buypty. Ony da uaqyty kelgende köre jatarmyz. Esterıŋızge sala keteiık, Kärekeŋ, Kärım Mäsımov 2016 jyldyŋ 8-qyrküiegınde QR Ūlttyq Qauıpsızdık Komitetınıŋ basşysy bolyp taǧaiyndaldy. Ol 2003-2006 jyldar aralyǧynda Nūrsūltan Nazarbaevtyŋ kömekşısı boldy. Şyn mänınde Prezidenttıŋ kömekşısı bolyp qyzmet jasady.  Onymen qosa, premer-ministrdıŋ kömekşısı de boldy. Ekı märte premer-ministr kreslosyna otyrdy. 2007-2012 jyldary alǧaş ret, sosyn 2014-2016 jyldar aralyǧynda ekınşı märte. Mäsımov tıptı, bır jyldary Prezident Äkımşılıgınıŋ jetekşısı de boldy. Ol özın Prezidenttıŋ kömekşısı sanaityn. Ol turaly özı aşyq aitqan da. «Nūrsūltan Äbışūly, men būny alǧaş ret aityp otyrǧan joqpyn. 2007 jyly menıŋ kandidaturamdy ūsynǧanda da aitqanmyn. Qazır de sol sözımdı qaitalaǧym keledı. Nūrsūltan Äbışūly, men sızdıŋ kömekşıŋız boldym. Qazır de kömekşıŋızbın, jäne kömekşıŋız bolyp qala bermekpın. Bügın osy sözımdı depudattar aldynda qaitalaimyn. Senımderıŋızge ülken rahmet». Būl Kärım Mäsımovtıŋ öz sözı. 2014 jyly Qazaqstannyŋ premer-ministr bolyp qaita taǧaiyndalyp jatqanda aitqan bolatyn. «2007 jyldyŋ qaŋtarynda Nūrsūltan Äbışūly menı alǧaş ret premer-ministr etıp taǧaiyndady. Sol kezde men sızge, qandai qyzmetke taǧaiyndasaŋyz da sızdıŋ kömekşıŋız bolyp qala beretınımdı aitqanmyn. Bügın jäne bır märte qaitalaimyn. Men älı künge sızdıŋ kömekşıŋızbın. Men sızdıŋ şäkırtıŋızbın. Qazaqstandy damytudaǧy kelelı ısterge aralasuǧa mümkındık jasaǧanyŋyz üşın men maqtanamyn. Özımnıŋ eŋbegım arqyly men sızdıŋ senımıŋızden şyǧatynymdy däleldeimın». Būl da Kärım Mäsımovtıŋ sözı. Būl sözı Kärekeŋ Nūrsūltan Nazarbaevqa 2011 jyly aitqan. Mıne, solai. Özı aitpaqşy, eks-prezident Nūrsūltan Nazarbaevqa adal kömekşı bola bılgen, Kärekeŋ, endı ol kısı turaly kıtap jazbaq. Al bız ıske sät deumen şekteleiık. Serık Aidynūly «Adyrna» ūlttyq portaly