«Sottalýshy Álimbekovanyń buryn sottalmaǵanyn, jalǵyzbasty áıel ekenin jáne jaqsy minezdemelerin, sondaı-aq elimizdiń óner salasyndaǵy qoǵam qaıratker ekenin, jábirlenýshiniń tarapynan sottalýshynyń bostandyqta júrgenine qarsy emestigin eskerý qajet. Sonymen qatar Álimbekova bas bostandyǵynan aıyrylǵan jaǵdaıda, jábirlenýshi Nazarovaǵa múliktik salyǵyn óteý máselesi óziniń oń sheshimin tappaýy múmkin ekenin eskergen jón. Kórsetilgen mán-jaılardy eskere otyryp, Álimbekovaǵa taǵaıyndalǵan bas bostandyǵynan aıyrý jazasy tym qatań dep sanaımyn», - deıdi prokýror.
Sot otyrysynda memlekettik aıyptaýshy sottalýshy Gaýhar Álimbekovany QR QK 190-baby 3-bóligine (Alaıaqtyq) sáıkes kináli dep tanyp, 3 jylǵa bas bostandyǵyn shekteý jazasyn taǵaıyndaýdy surady.
Al, Gaýhar Álimbekovanyń advokaty buǵan deıin kesilgen úkimdi negizsiz dep sanaıdy. Sotta sóz sóılegen Shynqýat Baıjanov Álimbekovanyń da alaıaq Ordabaevaǵa aldanyp qalǵanyn málimdedi. Sondaı-aq, ol jábirlenýshi Baqyt Nazarovamen kezdesip, oǵan ánshiler jınap bergen 8 mıllıon teńgeni usynǵanyn joqqa shyǵarmaı aıtty, dep habarlaıdy Stan.kz aqparattyq agenttiginiń tilshisi sot zalynan.
"Qylmystyq Kodekstiń 23-baby bar. Eger áreketti jasaǵan adam óz áreketteriniń qoǵamǵa qaýiptiligin uǵynbaǵan bolsa, istiń mán-jaıy bolsa uǵyna almaǵan bolsa, qoǵamǵa tıgizer zardaptaryn aldyn ala boljap bilmegen bolsa, is-áreket kinásizdikpen jasalǵan dep tanylady. Men Álimbekovanyń áreketin kinásizdikpen jasalǵan dep esepteımin", - dedi advokat sotta.
Shynqýat Baıjanovtyń sózine qaraǵanda, 2013 jyly Álimbekova Ordabaevanyń aram pıǵylyn bilmegen. Tanystaryna páter alyp berý úshin 100 myń AQSh dollaryn jınap bergen.
"Ordabaeva keshegi sotta óz kinásin moıyndamady. Nazarova Álimbekovanyń ózi sekildi jábirlenýshi ekenin biledi.
Álimbekova án aıtady, aqsha taýyp beredi dep Nazarova onyń ústinen aryz jazǵan.
Nazarova Álimbekovanyń qylmysyn dáleldeý óte qıyn ekenin bilip, ony 2 jyl boıy jazyp júrgen. Álimbekova bilmeıdi, Nazarova qurbym dep oılap júrgen", - deıdi advokat.
Sózine qaraǵanda, tergeýshiler aýdıojazbanyń zańsyz dáleldeme ekenin eskermesten, oǵan saraptama jasaǵan. Ony dálel esebinde is materıaldaryna qosqan.
"Ony aıtpasam da bolar edi. Biraq sot osy aýdıotaspaǵa silteme jasaıdy. Men aýdıotaspany túgeldeı oqyp shyqtym. Árbir sózine mán berip, zerttep qaradym.
Onyń ishinde Álimbekovanyń kinásin dáleldeıtin eshqandaı sóz taba almadym. "Keshir, men aldandym, bilmeı qaldym" degen sózder joq. Kerisinshe Álimbekova óziniń de aldanyp qalǵanyn, Ordabaevanyń aram pıǵylyn bilmeı qalǵanyn qaıta-qaıta aıtyp otyrady. Biraq adamgershiligi kúshti, sezimtal. Óner adamdarynyń bári sondaı ǵoı. Nazarovany aıap, ózi de qatty baı adam emes. Sonda da biraz ýaqyt boıy aqsha berip otyrǵan", - deıdi Baıjanov.
"Álimbekova "meniń eshqandaı kinám joq, beretin aqsham da joq. Ekinshiden, ózim aldanyp qalǵan adammyn, aqsha berýge mindetti emespin" dep aıtty. Degenmen de ánshiler qaýymy aqsha jınady. "Jigitter" tobynyń prodıýseri, Aqbota (red. Kerimbekova) deıtin ánshi bar. Sol ekeýi qolqa salǵannan keıin kafede kezdestik. Arǵy jaǵynda Nazarova advokatpen otyrdy, bergi jaǵynda biz úsheýmiz otyrdyq.
Kinási bolmasa da, 8 mıllıondy alyńyz da, aqshany aldym dep jazbaı-aq qoıyńyz, biraq basqa eshqandaı talap-tilegim joq dep jazyńyz dedim. Qalǵan aqshany Ordabaevadan óndirip alasyz dedim. Ol kisi "joq, maǵan 16 mıllıondaı aqsha ber" dedi", - deıdi Shynqýat Baıjanov.
Sóz sońynda advokat 2019 jyldyń 30 qańtarynda qabyldanǵan úkimdi zańsyz dep tanýdy, ánshi Gaýhar Álimbekovaǵa qatysty aqtaý úkimin shyǵarýdy surady.
Stan.kz
