Pavlodarda belgılı aqyn, jazuşy halyqaralyq «Ruh» ädebi baiqauynyŋ jeŋımpazy Ūlarbek Nūrǧalymmen kezdesu keşı öttı, dep habarlaidy pavlodarnews.kz tılşısı.
«Jebe» qoǧamdyq bırlestıgı jäne «Nur Otan» partiiasy Pavlodar oblystyq filialy janyndaǧy «Jas Otan» jastar qanaty ūiymdastyrǧan şara barysynda jazuşy körermenderdıŋ sūraqtaryna jauap bere otyryp, ūlttyq bolmys jaiynda söz qozǧady. Sondai-aq, juyrda jaryq körgen «Daiaǧaşşy» kıtabynyŋ tanystyrylymy öttı.
Ūlarbek Nūrǧalymnyŋ aituynşa, söz joǧalsa, ūlt joǧalady. Al, ūlttyq üǧymǧa tıkelei äser etıp tūrǧan, bolmysymyzǧa jaqyndatatyn ol – än, küi, jyr. Oǧan qosa, jazuşy qazaqta «qaiyrşylyq ūǧymy» joq ekenın aityp, kıtapqa enbegen äŋgımesın paş ettı.
- Auyldaǧy adamdar tabiǧi äŋgımeler tudyrady, - dedı Ūlarbek Nūrǧalym. – Qai auylda kedei joq. Bızdıŋ auylda bır kedei boldy dep aitpaimyn. Kedei köp boldy. Onyŋ ışınde kedeidıŋ bır kedeiı boldy. Qyrsyq kedei edı. Aǧaiyndary kömektesıp tūrsa da, jetıspei jatady. Auyl halqy şarualary bolsa kömekke şaqyratyn. Sony anau «maǧan dünie berdıŋder, sol üşın şaqyrasyŋdar. Beresıŋder de, būldaisyŋdar. Men qūlmyn ba senderge» dep özge auyldarǧa qaiyr sūrauǧa şyǧady. Barǧan auylynda ruynyŋ bedeldı azamaty jolyǧyp, män-jaidy bılgennen keiın ony soqqyǧa jyǧyp, qoiyn berıp, auylyna äkep, kelesıde qaiyr sūrap şyqsa aiaǧyn syndyratynyn jetkızedı.
Ru degen osylai jamandyqtan tyiu üşın, ūstap otyru üşın kerek edı. Qazır ol basqa formatta. Osyndai tyiym joqtyǧynan qazır ne bolmai jatyr. Sondai-aq Ūlarbek Nūrǧalym qazaqtyŋ dästürlı änı adamdy jan-jaqty oilanuǧa tärbieleitının aitty.
- Qazaqtyŋ änderın keudemızge qondyra alatyn bolsaq, sondai rahattanamyz, - deidı jazuşy. – Basqa närsenıŋ keregı joq bop qalady. Estrada qūlaǧyŋyzǧa kırmeitın bolady. Bügınde «aq qaiyŋnyŋ tübıne kel» degen siiaqty qūiyla berse, sana basqaşa oilanuǧa talpynbaidy. «Anda barsam joq, mynda barsam da joq, taz bolsaŋ da kelşı» dep būryn qyz sezımın bıldırmegen. Qyzdyŋ qadırı osynşa därejede taptalǧan emes. Ony bärımız mäz bolyp tyŋdap jürmız. Būryn qyzdyŋ baǧasy biık edı, qyz qūrmettı orynda boldy. Būndai änder sananyŋ tūiyqtaluyna, tyǧyryqqa tıreluıne äkeledı. Örttıŋ özı symnyŋ qysqa tūiyqtaluynan bolady. Suisid jasaityn adamdardyŋ oilary tūiyqtalyp qalady. Al, qazaqtyŋ bır änınde bırneşe oi bolady, tüsıngennıŋ sanasy san türlı oiǧa batady.
Kezdesu keşıne öŋırımızdegı JOO-nyŋ, kolledj studentterı men ädebiet süier jastary jinaldy. «Nur Otan» partiiasy oblystyq filialy töraǧasynyŋ bırınşı orynbasary Nikolai Dychko aqynǧa ūlttyq baǧyttaǧy tärbiege atsalysqany üşın alǧys hat tabystady.
Orazbek Saiahat
