22 nauryzda Qazaqstan astanasynyŋ atyn "Nūr-Sūltan" dep özgeruıne "qarsylyq bıldırgen soŋ oquynan şyǧarylǧany" habarlanǧan 16 jastaǧy student turaly bılım ministrı Küläş Şämşidinova pıkır bıldırdı. Būl turaly "Qazaqparat" agenttıgı habarlady.
Ministrdıŋ sözınşe, "balany oqudan şyǧaru turaly aryzdy ata-anasynyŋ özı tüsırgen".
"Bız ol jaiynda ekı kün būryn estıdık. Damir degen jıgıt. Onyŋ mäselesın zerdeleudı bastadyq. Bızge tüsken aqparatqa säikes, studenttıŋ ata-analary balasyn alyp ketu turaly ötınıştı özderı bergen. Degenmen, qazır bız özımız tekserıp jatyrmyz. Eger ony zaŋsyz oqudan şyǧarsa, zaŋ boiynşa tiıstı şaralar qoldanylady" deidı Şämşidinova.
Bıraq Azattyqpen söilesken oqudan şyqqan balanyŋ anasy Mira Djanūzaqova ministr sözın "ötırık" dedı.
- Joq. Olar söitıp aldap jatyr. Mekteptıŋ özı ekı ai oqytuǧa zorǧa aldy. [Kolledj äkımşılıgı bızben] söilesken joq, bırden şyǧaryp jıberdı. Qol qoidyq. "Şyǧyŋdar" dedı. Öz balamdy oqudan şyǧaryp qaitem? - dedı anasy.
Qazaqstan prezidentı qyzmetıne 20 nauryzda kırısken Qasym-Jomart Toqaev astanaǧa Nūrsūltan Nazarbaevtyŋ atyn berudı ūsynǧan. Bırneşe künnen soŋ, 23 nauryzda, jarlyqqa qol qoidy.
Ūsynysqa qazaqstandyqtar ärtürlı reaksiia tanytty: jergılıktı bilık Qazaqstan qalalarynda astana atauynyŋ özgeruın qoldaǧan konsertter ötkızdı, al äleumettık jelıde türlı belsendıler būǧan qarsylyq bıldırgen. Polisiia 22 nauryzda "Nūr-Sūltan" atauyna qarsy bırneşe tūrǧyndy ūstaǧan.
