Türkıstan oblysyndaǧy apaly-sıŋlılı jetkınşekterdı ekı jylǧa juyq qinap kelgen ögei şeşe ekı bappen tergelıp jatyr, – dep habarlaidy KTK tılşısı.
28 jastaǧy äiel qazır uaqytşa qamau abaqtysynda. Tıptı, qyzdarynyŋ osyǧan deiıngı jaǧdaiyn bılmedım dep aqtalǧan äkesıne de qatysty “kämeletke tolmaǧandardy tärbieleu mındetın oryndamaǧany” üşın tergeu jürgızılıp jatyr. Sondai-aq, audandaǧy selqostyq tanytqan jauapty qyzmetkerler de jazasyz qalmaidy. “Jalpy, jaǧa ūstatarlyq būl jaǧdaiǧa selqostyq sebep bolyp otyr. Sondyqtan, mektep mūǧalımderınen bastap, direktory bar, bılım bölımı basşysy men audan äkımınıŋ orynbasarynyŋ mäselesı mai şammen qaralatyn bolady. Qazır, būl mäsele ombudsmen, bılım ministrı men bas prokurordyŋ jeke baqylauynda”, – deidı Bılım jäne ǧylym ministrınıŋ keŋesşısı Raisa Şer. Audan äkımınıŋ orynbasary, mektep direktory men orynbasary, üş qyz oqyǧan synyptardyŋ jetekşılerı tärtıptık jazaǧa tartyldy. Jūldyz Köbeeva üş jyl būryn äkesımen azamattyq nekege tūryp, keiın ūl tuǧan soŋ, ögei qyzdaryna äŋgır taiaq oinatudy bastapty. Jäbırlenuşılerdıŋ aituynşa, türlı tapsyrmalar berıp, qit etse ūryp-soǧyp, tıptı tyrnaqtyŋ astyna ine tyǧudan taiynbaǧan. Mūzdai suǧa salyp qinap, mūzdatqyştyŋ ışıne de qamap jäbırlep kelıptı. Ekı jylǧa juyq azaptalǧan qyzdardyŋ bırı ögei şeşenıŋ ozbyrlyǧyn synyp jetekşısıne aityp bergen soŋ ǧana qūzyrly oryndar äreket ete bastady. Qazır, 11, 13 jäne 14 jastaǧy üş jetkınşekpen psihologtar jūmys ıstep jatyr.
