Qazaqstannyŋ industriia jäne infraqūrylymdyq damu ministrlıgı Maŋǧystau oblysy "Qalamqas" kenışındegı apatqa qytailyq Si Bu kompaniiasy jūmysşylarynyŋ önerkäsıptık qauıpsızdık erejelerın saqtamauy sebep bolǧanyn habarlady. 2 mamyrda apatty zertteu komissiiasynyŋ qorytyndysymen tanystyrǧan industrialdy damu jäne önerkäsıptık qauıpsızdık komitetınıŋ töraǧasynyŋ orynbasary Nyǧmetjan Maqajanov Nūr-Sūltanda ötken jiynda osylai dep mälımdedı.
"Ūsynylǧan materialdardy qarastyryp, Si Bu injenerlık būrǧylau kompaniiasynyŋ ūŋǧymany būrǧylau kezınde önerkäsıptık qauıpsızdık talaptaryn būzǧany, būl öz kezegınde gaz ben sudyŋ şyǧuyna alyp kelgenın komissiia anyqtady. Merdıger ūiym Si Bu kompaniiasynyŋ ūŋǧymany saluǧa arnalǧan tehnikalyq jobany, mūnai jäne gaz ūŋǧymalaryn bekıtu jönındegı ädıstemelık nūsqaulardyŋ talaptaryn būzyp, sementtıŋ qataiuyn kütudıŋ belgılengen uaqytyn eseptemegen, ūŋǧymanyŋ saǧasy uaqytynan būryn aşylǧan" dedı Nyǧmetjan Maqajanov.
Onyŋ aituynşa, Si Bu "osy ūŋǧymanyŋ qūrylysyn qauıpsız jürgızuge qajet bolǧan öndırıstık baqylaudy qamtamasyz etpegen". Maqajanov būǧan qosa, kompaniia qyzmetkerlerınıŋ önerkäsıptık qauıpsızdık salasynda qajettı därejede mamandanbaǧanyn da jetkızdı.
Komitet basşysy apattyŋ sebepterı men jai-japsary jazylǧan akt jasalyp, "apattyŋ aldyn alu şaralary äzırlengenın" aitty. Tergep-tekseru materialdary qūqyq qorǧau organdaryna berılgen.
25 nauryzda Maŋǧystau oblysyndaǧy "Qalamqas" kenışındegı ūŋǧymalardyŋ bırınen ört şyǧyp, ört söndıruşıler bırneşe künnen keiın ǧana örttı söndıre alǧan.
Būǧan deiın äleumettık jelı qoldanuşylary "Qalamqas" kenışındegı ört turaly video taratyp, aumaqtyŋ ekologiialyq jaǧdaiyna alaŋdaǧan.
30 nauryzda kenış maŋyndaǧy aua, topyraq jäne su qūramyn zerttegen "Maŋǧystaumūnaigaz" AQ mamandarynyŋ zertteu qorytyndysyn jariialaǧan energetika ministrlıgı "auada lastauşy zattardyŋ joǧary konsentrasiiasy anyqtalǧan joq" dep habarlaǧan.
"Qalamqas" kenışın barlaumen - "Maŋǧystaumūnaigaz" kompaniiasy ainalysady.
"Azattyq" radiosy
