Máskeýde jolaýshylar ushaǵy apatqa ushyrap, ondaǵan adam opat boldy. Aldyn ala aqparat boıynsha, Sheremetevo áýejaıyna apatty jaǵdaıda qonǵan soń órtengen ushaqtan adamdardyń bir bóligi syrtqa shyǵa almaı qalǵan.
Mamyrdyń 5-i kúni keshke Reseı tergeý komıteti Máskeýdiń Sheremetevo áýejaıynda "Aeroflot" áýe kompanııasynyń "Sýhoı Sýperdjet" jolaýshylar ushaǵy apatqa ushyrap, 41 adam qaza tapqany týraly habarlady. Ushaqta barlyǵy 73 jolaýshy men 5 ekıpaj múshesi bolǵan. Mert bolǵandardyń arasynda ekıpajdyń bir múshesi bar dep habarlandy.
"Aeroflot" kompanııasy apattan tiri qalǵan 33 jolaýshynyń tizimin jarııalady. Aqparat agenttikteri aýrýhanaǵa jetkizilgen bes adamnyń ekeýiniń jaǵdaıy aýyr dep habarlady.
Jeksenbi kúni Máskeý ýaqytymen saǵat 17:57 kezinde Reseı astanasynan Mýrmanskige SU1492 reısimen ushyp shyqqan ushaq ekıpajy áýe kóliginde apatty jaǵdaı týyndaǵany týraly saǵat 18:25 kezinde jerge habarlaǵan. Arada bes mınýt ótkende Máskeý áýejaıyna oralǵan ushaq jerge qonǵannan keıin órtengen. Ushaqtaǵy jolaýshylar qutqarý quraldarynyń kómegimen syrtqa qashyp shyqqan.
"Aeroflot" kompanııasy baspasóz hatshysy jolaýshylardyń ushaqtan 55 sekýndta shyǵarylǵanyn aıtady. Biraq, "Interfaks" agenttiginiń derekkózderine silteme jasap habarlaýynsha, ushaqtyń artqy bóliginde bolǵan adamdar syrtqa shyǵyp úlgermegen.
Ushaq ushqyshtarynyń biri Denıs Evdokımov Baza basylymyna bergen suhbatynda áýede ushaqqa naızaǵaı túsip, saldarynan ushaq júıesi isten shyqqanyn rastaǵan. Ekıpaj janarmaıy tolyq ushaqpen apatty jaǵdaıda jerge qonýdy uıǵarǵan. Ushqyshtyń aıtýynsha, ekıpaj ushaqty qondyrǵan kezde arnaıy nusqaýlyq talaptaryn oryndap, ushaq jyldamdyǵyn shekti shamadan asyrmaǵan. Biraq áýejaı alańyna qonǵan kezde ushaqtyń astyńǵy bóligi jerge soǵylyp, órt shyqqan. Agenttiktiń habarlaýynsha, fıýzelajynyń biri bóligi ushý alańyna birneshe ret soǵylǵan ushaqtyń artqy dóńgeleginiń tireýishi synyp ketken. Onyń synyqtary túsken qozǵaltqyshtan órt shyǵyp, ushaqtyń artqy bóligi tutas jana bastaǵan.
Áleýmettik jelide taraǵan vıdeolar men fotolarda áýejaıdyń ushý alańynda órtenip jatqan ushaqtan adamdardyń janushyra qashyp shyǵyp jatqan sáti beınelengen.
Órt saldarynan ushaqtyń artqy bóligi tutas janyp ketken. "Sýhoı" kompanııasynyń habarlaýynsha, 2017 jyly zaýyttan shyqqan bul ushaq bıyl sáýirde tehnıkalyq baıqaýdan ótkizilgen.
Qazaqstan syrtqy ister mınıstrligi Reseı astanasyndaǵy ushaq apatynda qaza tapqandar arasynda qazaqstandyqtar bar-joǵyn áli habarlaǵan joq.
- Reseıde ushaq apatyna baılanysty qylmystyq is qozǵalyp, apat sebebin anyqtaý úshin komıssııa quryldy.
- Máskeýdiń Sheremetevo áýejaıy mamyrdyń 5-i kúni keshke ushaq qabyldaýdy shektep, basqa jaqtan kelgen áýe reısteriniń kóbin Domodedovo, Nıjnıı Novgorod nemese Sankt-Peterbýrgke burdy.
- Sýhoı Sýperdjet – SSSR taraǵannan keıin Reseıde jańadan jasalǵan alǵashqy jolaýshylar ushaǵy. Jaqyn baǵyttar boıynsha jolaýshy tasymaldaýǵa arnalǵan bul ushaqty 2011 jyldan beri birneshe eldiń áýe kompanııalary paıdalanyp keledi. Reseılik Sýhoı Sýperdjet ushaǵynyń qatysýymen osymen jetinshi tótenshe oqıǵa tirkelip otyr. Buǵan deıin 2012 jyly mamyrdyń 9-y kúni Indonezııada osyndaı ushaq apatqa ushyrap, 45 adam (37 jolaýshy men 8 ekıpaj múshesi) qaza tapqan edi.
