Toqaev teledebatqa qatysa ma?

Prezıdenttikke úmitkerlerdiń pikirtalasy bolsa da, ótkir saýaldardy kútýdiń qajeti joq. Saıasattanýshy Ádil Qaýkenov Qazaqstan-Reseı sarapshylar forýmynda osyndaı pikirin aıtty, dep habarlaıdy Sputnik Qazaqstan.

Onyń oıynsha, saılaýaldy úgit-nasıhat aıasynda teledebattardy ótkizgen durys. Óıtkeni halyq mundaı sharalarǵa qatty qyzyǵady. Qazaqstandyqtar AQSh pen Ýkraına sııaqty shet elderde ótken teledebattardy da qyzyǵyp kórdi.

Qasym-Jomart Toqaev teledebatqa qatysa ma?

"Endi, oǵan Nur Otan partııasynyń kandıdaty Qasym-Jomart Toqaev qatysa ma, joq pa, ol jaǵyn aıtý qıyn. Sebebi ol qysqa ýaqyttyń ishinde barlyq aımaqtardy aralap, saılaýshylarmen kezdesýdi josparlap otyr. Al teledebattarǵa qatysý úshin ýaqyt qajet. Eger Qasym-Jomart Toqaev debatqa qatyssa, onda halyqtyń osy sharaǵa degen qyzyǵýshylyǵy arta túsedi. Sebebi bári qazirgi prezıdenttiń pikirtalas kezinde ózin qalaı ustaıtynyn kórgisi keledi", - deıdi Qaýkenov.

Saıasattanýshynyń aıtýynsha, Qasym-Jomart Toqaev debatty oıdaǵydaı ótkize alady.

"Sebebi onyń dıplomatııalyq tájirıbesi mol. Oǵan qosa, Birikken ulttar uıymynda biraz ýaqyt eńbek etti. Alaıda dál qazir onyń teledebatqa qatysý jaǵy belgisiz. Qasym-Jomart Toqaev debatqa shyqpasa, saılaýshylarmen kezdesý sharalaryna basymdyq beretin bolady", - deıdi saıasattanýshy.

Al saıasattanýshy Andreı Chebotarev qazirgi prezıdentke teledebatqa shyǵý qajet dep sanaıdy. Sebebi kandıdat Jambyl Ahmetbekovten basqasynyń bári saılaýǵa alǵash ret qatysyp jatyr.

"Máselen, tuńǵysh prezıdent úshin teledebatqa qatysýdyń qajeti joq. Al Toqaev úshin bul - úlken múmkindik. Ol halyqtyń aldynda ózin kórsete alady. Basqa kandıdattar da keńinen tanyla alady. Ásirese, Ámirjan Qosanov úshin tıimdi. Sebebi ony adamdar jaqsy biledi, biraq ózi teledıdardan kóp kórine bermeıdi", - dedi Chebotarev.

Ýkraınadaǵy pikirtalasty Qazaqstanda kóre alamyz ba?

Sarapshylardyń oıynsha, debattar kezinde ózekti degen máselelerdiń bári kóteriledi. Alaıda qyzý pikirtalas bolmaıtyn sııaqty.

"2016 jyly bizde parlament saılaýy kezinde bir debattar boldy. Oǵan barlyq partııalardyń ókilderi qatysty. Sol kezde ótkir suraqtar bolǵan joq, qyzý pikirtalasty da baıqamadyq. Osy joly da solaı bolatyn sııaqty", - deıdi sarapshy.

Ádil Qaýkenov te teledebattar saılaýaldy ýádelermen shekteledi dep sanaıdy. Sondyqtan  kútpegen málimdemeler bolmaıdy. Qazaqstandaǵy teledebattardy Petr Poroshenko men Vladımır Zelenskıı arasyndaǵy pikirtalaspen salystyrýǵa kelmeıdi.

"Bizdegi debattar Zelenskıı pen Poroshenko arasynda bolǵan pikirtalasqa uqsamaıdy. Árıne, árbir kandıdattyń óziniń "fıshkasy" bolady. Keıbireýleri popýlızmge de salynatyn shyǵar. Ony qazirdiń ózinde baıqaýǵa bolady", - dedi Qaýkenov.

Aıta ketsek, Qazaqstanda prezıdent saılaýy aldyndaǵy teledebat 2005 jyldyń 17 qarashasynda ótken bolatyn. 14 jyl buryn QR Ortalyq saılaý komıssııasy "Habar" telearnasynda Qazaqstan prezıdenttine kandıdattar arasynda pikirtalas uıymdastyrdy. Oǵan tórt kandıdat: Erasyl Ábilqasymov, Álıhan Báımenov, Mels Eleýsizov jáne Jarmahan Tuıaqbaı qatysty. Qazaqstannyń sol kezdegi prezıdenti Nursultan Nazarbaev pikirtalasqa qatysqan joq.

Osy joly Qazaqstan prezıdenttigine jeti adam talasady. Olar:

• Nur Otan partııasy atynan Qasym-Jomart Toqaev;
• "Ult taǵdyry" qozǵalysy atynan Ámirjan Qosanov;
• Qazaqstan kommýnıstik halyq partııasy atynan Jambyl Ahmetbekov;
• "Aýyl" partııasy atynan Tóleýtaı Raqymbekov;
• "Aq jol" demokratııalyq partııasy atynan Danııa Espaeva;
• Kásipodaqtar federaııasy atynan Amangeldi Taspıhov;
• "Uly dala qyrandary" qoǵamdyq birlestigi atynan Sádibek Túgel.