Bıyl 02 mamyrda Almaty qalasynyń Terekti yqshamaýdany turǵyndary tapa-tal túste jantúrshiktirerlik oqıǵanyń kýási boldy. Sáýle mektepke eki balasyn jetektep kele jatty. Qaısha 2-synypta oqıdy. Al Meıirban áli mektepke barmaǵan. Ana men eki búldirshinniń oıynda eshteńe joq edi. Jaımashýaq kóktemniń kúni aldaǵy jazǵy demalystyń kóptegen qýanyshty kúnderine ýáde berip jatqandaı bolatyn. Jaıaý adam júretin jolaqtyń ústinde shyqqanda 6 jasar Meıirban alǵa ozyp ketipti. Sol-sol-aq eken, qarsy jolaqtan shyǵa kelgen «Leksýs» kóligi jyldamdyǵyn da tejemesten, tipti, tejegishti de baspastan, quıǵytyp kelip, Meıirbandy anasynyń kóz aldynda julyp áketti. Soqqynyń qatty bolǵany sonshalyqty, beıkúná sábı 15-20 metr jerge deıin ushyp ketti. Sáýleniń shyrqyraǵan jan daýysy typ-tynysh kósheni basyna kóterdi. Biraq bári kesh edi. Perishteniń jany kólik myjǵylap tastaǵan keýdesin tastap o dúnıege kete bardy. Álginde ǵana keýdeni kernegen tátti qııal orny tolmas óksikke ulasty...
Sot-medıınalyq saraptama qorytyndysy Meıirbannyń bas súıeginiń synyp, mıǵa qan quıylǵanyn, aıaǵy men jambasynyń kúl bolyp ketkenin anyqtady. Biraq polıııa tarapynan osy oqıǵa boıynsha qylmystyq is qozǵaý, kólik rólinde otyrǵan Merýert Sybanqulovany suraq-jaýapqa alý, sotqa deıin qamaýǵa alý máselesi sózbuıdaǵa salynyp, sıyrquıymshaqtanyp barady. Aıypkerdiń týystary qaraly úıden keshirim suraýdyń ornyna «Qyzymyzdyń bolashaǵyna balta shapqyzyp qoımaımyz! Qoldaryńnan kelgendi istep alyńdar!» dep aıqaılap, dóńaıbat kórsetip ketipti. Qylmystyq istiń suıylyp ketýin jáne kináli taraptyń tizege salý sebebin anyqtamaq bolyp, zertteý jasaǵanymyzda mynandaı jaıtqa keziktik.
Aıypker Merýert Sybanqulovanyń ákesi Talǵat Sybanqulov Almaty qalalyq kiris departamenti uıymdastyrý bóliminiń Uıymdastyrý-Qarjy basqarmasynyń bas mamany bolyp qyzmet atqarady. Osy famılııalas Ernat Sybanqulov bolsa, kezinde Almatynyń Almaly jáne Medeý aýdandarynda, Jambyl oblysynda, Atyraý oblysynda prokýror bolyp qyzmet atqarǵan. Jaqynda ǵana respýblıkanyń Bas kólik prokýrory bolyp taǵaıyndaldy. Istiń osyndaı sozbaqqa salynýyna, aıypker týystarynyń kúshenip, sózben kúsh kórsetýine osy jaǵdaı dem berip otyrǵan syńaıly. Biletinderdiń aıtýynsha, Merýerttiń ákesi Talǵat pen Ernat Sybanqulovtar nemereles aǵaıyndy kórinedi. Iaǵnı, Talǵat pen Ernattyń ákeleri týǵan aǵaıyndy. Ótken jyly Qyzylorda oblysynda osyǵan uqsas eki oqıǵa tirkelgen edi. Onyń birinde ákesiniń kóligin aıdan shyqqan 14 jastaǵy bozbala zebranyń ústinde boıjetken qyzdy qaǵyp óltirdi. Biraq «kámelet jasyna jetpegendikten» degen sebeppen, jasóspirim qylmystyq jazadan sytylyp ketti. Ol kezde de «tiregi myqty» aıypker jaq marqumdardyń úıine baryp, qorqytyp-úrkitip edi. Onyń aldynda Aral aýdanynda Aqnur Túkeshova esimdi boıjetkendi Aral aýdandyq mádenıet úıiniń dırektory kólikpen qaǵyp ketip, qylmystyq jaýapkershilikten ol da qutylyp ketti. Rıdder qalasy ákiminiń orynbasary Baýyrjan Qurmanbaev ta mas kúıinde kólik aıdap, Smolnıkov degen azamatty soǵyp óltirdi. Bul is te sál bolmaǵanda jabylyp qalýy múmkin edi. Qoǵamdyq pikirdiń qysymymen Qurmanbaev 1 ǵana jylǵa sottalyp, 5 jyl boıyna kólik quralyn aıdaý quqyǵynan aıyryldy.
Sonda, elimizdiń zańdary kimge qyzmet etedi? Al bastyqtar men olardyń týystaryna qansha adam óltirýge quqyq berilgen? Kúdikti Merýert Sybanqulova ne sebepti áli bostandyqta júr? Sotqa deıingi bultartpaý sharalary ne sebepti qoldanylmaı otyr? Meıirbannyń mezgilsiz ajalyna baılanysty Almaty qalalyq ishki ister departamenti bul suraqqa qandaı jaýap beredi eken? Álde, qalyń qaltadan tógilgen aqsha kisi ólimin de jaýyp jibermek pe?
Toqtar Jaqash, jýrnalıst
