Qazaqstandyq saiasattanuşy ärı qytaitanuşy Konstantin Syroejkin "memleketke opasyzdyq jasau" baby boiynşa küdıkke ılınıp, ūstaldy. Būl aqparatty Qazaqstannyŋ ūlttyq qauıpsızdık komitetıne (ŪQK) sılteme jasaǧan jergılıktı aqparat agenttıkterı habarlady.
"ŪQK 2019 jyly 15 qaŋtarda 1956 jyly tuǧan Qazaqstan Respublikasynyŋ azamaty Konstantin Syroejkinnıŋ üstınen 175-bap, 1-bölıgı boiynşa ("memleketke opasyzdyq jasau") qylmystyq ıs qozǧady" delıngen ŪQK habarlamasynda.
ŪQK-nıŋ baspasöz qyzmetınıŋ habarlauynşa, 62 jastaǧy saiasattanuşyny 19 aqpanda ūstaǧan. Komitet ökılderı būdan basqa mälımet aitpaǧan.
Azattyq Konstantin Syroejkinnıŋ ısıne bailanysty ŪQK-ǧa 6 mamyrda resmi saual jıberdı. Ötınışte Azattyq tılşısı küdıktınıŋ advokat qyzmetın paidalanu qūqyǧy jäne qamau jaǧdaiy turaly sūraǧan edı. 16 mamyrda komitettıŋ baspasöz qyzmetı Azattyqqa redaksiiadan kelgen "hatty taba almai otyrǧanyn" aitty. 17 mamyrda hat qaita jıberılıp, ŪQK ony alǧanyn rastady.
Jergılıktı BAQ-tyŋ jazuynşa, Almatyda tuyp-ösken 62 jastaǧy Konstantin Syroejkin Qazaqstanda ūzaq jyldar boiy qyzmet atqarǧan, elde Qytai mäselelerı boiynşa jetekşı sarapşylardyŋ bırı. Orys, aǧylşyn jäne qytai tılınde jaryq körgen myŋnan astam maqalanyŋ avtory. 2006 jyldan bastap Qazaqstan prezidentı janyndaǧy Qazaqstandyq strategiialyq zertteuler institutynyŋ bas ǧylymi qyzmetkerı bolǧan.
Syroejkindı aqpan aiynda qamauy mümkın ekenın būǧan deiın Azattyq tılşısıne Adam qūqyǧyn qorǧau jönındegı qazaqstandyq biuronyŋ direktory Evgenii Jovtis aitqan. Onyŋ aituynşa, däl osy uaqytta qytaitanuşynyŋ ärıptesterımen bailanysy üzılıp qalǧan.
Jergılıktı BAQ-tyŋ jazuynşa, ol aqpan aiynda ötken respublikadaǧy qytaitanu boiynşa konferensiia kezınde baiandama jasauy tiıs bolǧan, bıraq şaraǧa qatyspaǧan. Säuır aiynda Qytaidyŋ "Bır beldeu - bır jol" atty ırı jobasyna arnalǧan Almatydaǧy ırı şaraǧa da kelmegen.
"Azattyq" radiosy
