Qonaev qalasyndaǵy qarttar úıinde 71 jastaǵy qarııa tirideı janyp ketken. Bul týraly Almaty.tv telearnasy jarııalady, dep habarlaıdy “Adyrna” ulttyq portaly.
Aqparatqa sáıkes, múgedektigi bar marqumdy ondaǵy qyzmetkerler órtenip jatqan kezde bir-aq kórgen. Denesiniń 80 paıyzyn kúıik shalǵan aqsaqal aýrýhanada kóz jumǵan. Árkim ózi jeke turatyndyqtan, órtengenin kórmegen.
Turǵanda estidim, bir kisi qaıtys bolyp ketipti dep. Kózi durys kórmeıdi, – dedi qarttar úıiniń turǵyny Qabyr Muhamedjan.
Al «Sharapat» áleýmettik qyzmet kórsetý ortalyǵynyń qyzmetkerleri kórsetken bólme órt bolǵan jerge asa uqsaı qoımaıdy. Degenmen, olar qart bólmesinde temeki tartqan, sodan órt shyqqanyn aıtady. Órt saǵat 21:00-de shyqqan.
Tórt qyzmetkerdiń ekeýi - kútýshi. Olar 59 adamnyń tańerteńnen bastap pampersin aýystyrady. Eki meıirbıke qyzmet alýshylardyń densaýlyqtaryna jaýap beredi. Ol kisi mazasyz temeki shegedi, al bizde temeki shegýge tyıym salynǵan, – dedi aǵa meıirbıke Janar Baısalbaeva.
Qonaev qalasynyń Tótenshe jaǵdaılar basqarmasy mekemeni tekserisip, talapqa saı kelmeıtin tustaryn kórsetken. Alaıda qarttar úıiniń basshysy esh shara qoldanbaǵan.
Atalǵan mekeme 2023 jyly 28 tamyzda arnaıy ýaqytynda qyzmet kórsetetin kelisimshartty kórsetpedi. Zań buzyldy, ony joıý úshin eki aı ýaqyt berilgen. Qazir 15 pýnkt boıynsha ereje buzý anyqtaldy. Bólmeler avtomatty sıgnalızaııamen jabdyqtalmaǵan, – dedi Tótenshe jaǵdaılar basqarmasy bastyǵynyń orynbasary Danııar Shyndaýletov.
Bul týraly dárigerler qarııanyń óte aýyr jaǵdaıda aýrýhanaǵa túskenin aıtady. Ólim aýyzynda jatqan qyzmet alýshynyń alǵan jaraqaty aýyr bolǵan soń, birden jansaqtaý bólimine jatqyzǵan.
Denesi 75-77 paıyz kúıip ketken. Al kúıik tereńdigi 2-3 AB bop esepteledi, – dedi qalalyq kópbeıindi aýrýhananyń travmatolog dárigeri Sherzod Nýrýllaev.
Oblystyq prokýratýra qyzmetkerleri iske qatysty qylmystyq is qozǵalyp, óz-ózine qol jumsaýǵa ıtermeleý faktisi boıynsha tergelip jatqanyn habarlap otyr.
Osy qarttar úıinde 2023 jyldyń 13 naýryzynda taǵy bir qarııa asylyp ólgen.
