Ýkraına prezıdenti Vladımır Zelenskıı "Ýkraına aýmaǵynyń tutastyǵyn qalypqa keltirý isinde kóshbasshylyq tanytyp, el ishin reformalaýda kómekteskeni úshin" Vashıngtonǵa alǵys aıtty. Jańa prezıdentti ulyqtaý rásimine qatysýǵa kelgen AQSh ókilderimen ótken kezdesýde Zelenskıı "AQSh - Ýkraınanyń Reseı agressııasyna qarsy turýda qýatty ári iri seriktesteriniń biri" dedi. Bul týraly Ýkraına prezıdentiniń saıty habarlady.
"Donbass pen Qyrymdaǵy Reseı agressııasyna ózimiz qarsy tura almaımyz. Sondyqtan sizderdiń kómekterińiz kerek. AQSh-tyń Reseıge qarsy sankııasyn kúsheıtýdi jalǵastyrǵandaryńyzdy qalaımyz" dedi Zelenskıı. Ol AQSh-qa qaýipsizdik salasynda kórsetken kómegi úshin alǵys aıtty.
Prezıdent Ýkraınada ashyq, ádil ári demokratııalyq reforma júrgizýge ázir ekenin aıtqan. Ol AQSh-ty Ýkraınaǵa úlgi dep atady.
Tap osy kún - 20 mamyrda Zelenskıı Eýropa komıssııasy tóraǵasynyń orynbasary Marosh Shefchovıchpen kezdesken. Bul kezdesýde de prezıdent Eýropa odaǵynyń Reseıge sankııa arqyly qysym kórsetýi jalǵasady dep úmittenetinin aıtqan. "Bul Reseıdiń Donbasstaǵy áreketteriniń zardabyn tartyp otyrǵan Ýkraına úshin óte mańyzdy" dedi Zelenskıı.
"Azattyq" radıosy
