Bır aidan asa uaqyt ışınde 13 aimaqty aralap şyqqan «Şahmat keruenı» 17 qazanda Ūlytauǧa kelıp aialdady. Qazaqstan şahmat federasiiasynyŋ öŋırlerdegı intellektualdy sport türın damytu üşın qolǧa alǧan jobasyna Freedom Broker kompaniiasy bas demeuşılık jasap otyr, dep habarlaidy «Adyrna» ūlttyq portaly.
Federasiianyŋ vise-prezidentı Aleksandr Babenko är oblystyŋ üzdıkterın anyqtau üşın jolǧa şyqqan keruen öz qatysuşylaryna jas boiynşa eşqandai şekteu qoimaitynyn aitty.«Turnirımızge ırıkteuden ötken kez kelgen oiynşy qatysa alady. Eresekter men jasöspırımder degen deŋgeige bölmeimız. Iаǧni, jasy ülken aqsaqal men kışkentai bala da bır şahmat taqtasynda kezdese beredı. Şahmat – qarapaiym ǧana sport türı emes, ol ūlttyŋ ziiatkerlık deŋgeiın köteretın ülken qūral. Soŋǧy jyldary şahmatşylarymyz halyqaralyq deŋgeide ülken jetıstıkterge jetıp jür. Degenmen bız elımızdıŋ alys audandary men öŋırlerıne de köŋıl bölgımız keledı. Osy qozǧalys jolynda qoǧam men bilık ökılderınıŋ atsalysqanyn qalaimyz», – dedı vise-prezident.Merekelık şarada Qazaqstan şahmat federasiiasynyŋ oblystyq filialy aşylyp, onyŋ töraǧasy bop oblys äkımınıŋ orynbasary Dastan Ryspekov taǧaiyndaldy.
«Soŋǧy şahmat baiqaularyna Ūlytau öŋırınen 100-den astam oiynşy qatysyp jür. Işınde 5-6 jattyqtyruşy bar. Oblys retınde endı-endı damyp kele jatqandyqtan, älı de aramyzdan jaŋa şahmatşylar men respublikalyq, halyqaralyq deŋgeide jarqyraityn jūldyzdar şyǧady dep senemın», – deidı federasiianyŋ Ūlytau oblysy boiynşa atqaruşy direktory Baǧdat Baisalbekov.Sondai-aq ol keruennıŋ keluı öŋır tūrǧyndarynyŋ şahmatqa degen qyzyǧuşylyǧyn arttyryp jatqanyn aitady. Şara kezınde bırneşe ata-ana kelıp, öz balalaryn şahmat üiırmelerıne qatystyrǧysy keletınderın jetkızgen. Filialdyŋ aşyluynan soŋ 11 kezeŋnen tūratyn blisten turnir bolyp, onda oblystyq ırıkteuden ötken 20 adam özara baq synasty. Nätijesınde, 8 synypta oqityn 13 jasar Sälımjan Saqbaev III oryn tūǧyryna şyqsa,avariialyq qūtqaru qyzmetkerı Almas Sarmūrzaev II orynǧa jaiǧasty. Al turnir kezeŋderınde eŋ joǧary körsetkışke jetken 10 jasar Maqsat Baisalbekov jüldelı I oryn biıgınen körındı. Üş jeŋımpaz da Türkıstanda ötetın grand-finalǧa joldama aldy.
«Men 5 jasymnan berı şahmat oinaimyn. Ony alǧaş äkemnen üirengem. Al qazır jeke jattyqtyruşymmen onlain daiyndalamyn. Turnirde maǧan II oryn alǧan Almas myqty qarsylas boldy. Ekeumız de 8 ūpaidan jinadyq. Bıraq koeffisient sany boiynşa men alǧa şyqtym», – deidı I oryn jüldegerı Maqsat.Sondai-aq äuesqoi şahmatşylar arasynda ötken jartylai finalda 15 jasar Elena Jaksymuratova «Äielder arasyndaǧy üzdık körsetkış», Vadim Gudovşikov «16 jasqa deiıngı üzdık qatysuşy» jäne Dmitrii İvanov «50jastan asqan ardager oiynşy» atalymdary boiynşa marapattalyp, 30 myŋ teŋge aqşalai syilyqtarǧa ie boldy. Ūlytau oblysy boiynşa aqparattyq bailanys: Aizada Orazhan +7 702 379 84 92
«Adyrna» ūlttyq portaly
