Endı eldegı 4 ūialy operatordyŋ üşeuı "Qazaqtelekomdıkı" bolady
Tele2 AB toby bırlesken käsıporyndaǧy öz ülesınıŋ baǧasy jönınde "Qazaqtelekommen" kelıstı, dep habarlaidy Zakon.kz Forbes.kz-ke sılteme jasap.
Qazırgı passivtı mındettemelerın sanamaǧanda Tele2-nıŋ taza tabysy 169 mln dollardy qūraityn bolady. Sonymen qatar, Tele2 aksionerınıŋ 80 mlrd teŋgelık nesiesı tolyq öteledı.
Tele2-nı satu mausymnyŋ soŋynda aiaqtalady.
– Tele2 Qazaqstanda sättı biznes qūrdy. Bırlesken käsıporyn klientter bazasyn aitarlyqtai ūlǧaityp, tabysyn, naryqtaǧy ülesın keŋeittı. Tele2 Qazaqstanǧa kırgen kezden berı bır klientke şaqqandaǧy mobildı internettı tūtynu jüz eseden astamǧa östı. Men Qazaqstanda qaldyrǧan mol mūramyzdy maqtan etemın, – dedı Tele2 prezidentı men bas atqaruşy direktory Anders Nilsson.Tele2 AB toby men "Qazaqtelekom" mobildı bailanys salasyndaǧy biznesterın bırıktıru turaly 2015 jyldyŋ qaraşasynda kelısken bolatyn. Şvesiialyq operatordyŋ 3 jyldan keiın aksiiadaǧy öz ülesın satu qūqyǧy bolǧan, 2018 jyldyŋ soŋynda kompaniia sol qūqyǧyn paidalanatyn bolyp şeştı. Qazaqstannan Tele2 ketkennen keiın "Qazaqtelekom" eldegı 4 operatordyŋ üşeuın baqylaityn bolady: Kcell, Tele2 jäne Altel. Endı elımızdegı mobildı bailanys naryǧynda tek Beeline ǧana täuelsız oiynşy bolyp qalady.
