Búgin Ortalyq saılaý komıssııasy 29 mamyrda «Habar» arnasynda aldaǵy 9 maýsymda ótetin kezekten tys prezıdent saılaýyna qatysatyn kandıdattar arasynda teledebat ótetinin habarlady.
"Biraq bul debatqa, qazirgi memleket basshysy, prezıdenttikten úmitker 7 kandıdattyń biri Qasym-Jomart Toqaev qatysa almaýy múmkin. Óıtkeni, 29 mamyrda elordada Joǵary Eýrazııalyq ekonomıkalyq keńestiń memleket basshylary deńgeıindegi otyrysy ótedi. Biz ondaı joǵary deńgeıdegi is-sharanyń ótetininen habarymyz bolǵan joq. Dál qazir - prezıdent saılaýynyń úgit-nasıhat kezeńi. Sondyqtan ondaı is-sharalar óte kóp", - deıdi Ortalyq saılaý komıssııasynyń ókili Lázzat Súleımenova.
Onyń aıtýynsha, teledebatqa úmitkerlerdiń shtabynan 2 adam qatyssa jetkilikti. Kandıdattyń teledebattan bas tartýǵa quqyǵy bar.
Aıta keteıik, teledebat 3 raýndtan turady. Birinshi raýndtyń taqyryby – Qazaqstannyń ekonomıkalyq damý basymdyqtary». Ekinshi raýnd «Qazaqstannyń áleýmettik jańǵyrýy» dep atalady. Úshinshi raýndtyń taqyryby – «Saılaýshylarǵa arnaý». Onda qatysýshylar tikeleı saılaýshylaryna arnap sóz sóıleıdi.