Temirtaýda eki jasar ulyn aıýandyqpen óltirgen ógeı áke ómir boıyna bas bostandyǵynan aıyryldy, habarlaıdy “Adyrna».
Sot 8 qarashada ótken. Sot otyrysynda aıyptalýshynyń erekshe qatygezdikpen jasaǵan qylmysy aıtyldy.
“2023 jyldyń 23 naýryzynda Temirtaýdaǵy páterlerdiń birinen eki jasar sábıdiń máıiti tabyldy. Kúdikti 24 naýryzda ustaldy. Ol kinásin moıyndady. 27 naýryzda qamaýǵa alyndy”, – delingen habarlamada.
Derekterge saı balanyń júrek tusyndaǵy pyshaq jaraqattarynan bólek, qoly da synǵan. Anasynyń aıtýynsha, kúıeýi ustalǵan kezde onyń qoldarynda tilik bolǵan. Ol óz tamyryn kespek bolǵan. Al tergeý barysynda túrmege túspes úshin ózin jyndy etip kórsetkisi kelgen.
Er adam ómir boıyna bas bostandyǵynan aıyryldy.
Eske salsaq, Temirtaýda er adam azamattyq nekede turǵan áıeliniń balasyn óltirgen. Keıin búldirshinniń anasy kúıeýiniń balalar úıinde tárbıelengen, burynǵy áskerı qyzmetker bolǵany týraly derektermen bólisti. 18 ret pyshaqtaǵan azamattyń mundaı qatygezdik kórsetýine ne sebep bolǵany belgisiz.
