Búgin, 25 qarasha kúni Ál-Farabı atyndaǵy Qazaq ulttyq ýnıversıtetinde «Ál-Farabı shákirtteri - VIII» qalalyq pikirsaıys týrnıri bastaldy, dep habarlaıdy «Adyrna» tilshisi.
«Ál-Farabı shákirtteri - VIII» 2015 jyldan beri jyl saıyn uıymdastyrylyp kele jatqan dástúrli debat týrnıri. «Altyn sapa» ıntellektýaldy pikirsaıys klýbynyń bastamashyldyǵymen ótip jatqan bıylǵy oıynǵa Almaty qalasy boıynsha 20-dan astam debat klýbtarynan 64 frakııa qatysýda.
Eki kúndik týrnır saltanatty ashylýmen bastaldy. Jastar dombyra, qobyz, vıolonchel, gıtara syndy túrli aspaptarda óner kórsetip, debat oıyny týraly óz oılaryn ortaǵa saldy.
Birneshe týrnırlerdiń ótýine arqaý bolǵan «Adyrna» qoǵamdyq qorynyń prezıdenti Arman Áýbákir oıyn aldynda qatysýshylarǵa sáttilik tiledi.
«Debat oıyny - ıntellektýaldy oıyndardyń arasyndaǵy úlken kúsh. Qazirgi tańda jetistikke jetip jatqan túrli tulǵalardyń kóbi debatshylar. Sondyqtan «Adyrna» qoǵamdyq qory birneshe jyl qatarynan debat oıyndaryna demeýshilik etip keledi. Búgingi oıynǵa barshańyzǵa sáttilik tileımin. Eldiń damýyna, órkendeýine negiz bolatyn tulǵa bolýlaryńyzǵa shyn júrekten tilektespin», – dedi ol.
Ashylý saltanatynyń sońynda «Altyn sapa» IPK koordınatory Aqsholpan Súndetova oıynshylarǵa jyly lebizin bildirip, týrnır erejelerimen túsindirip ótti:
«Týrnır tolyq formatta dástúrli erejede ótedi. Qurmetti debatshylar barshańyzǵa sátti oıyn tileımin. Shyn myqty jeńsin», – dedi ol.
Eske sala keteıik, «Altyn sapa» ıntellektýaldy pikirsaıys klýby 2007 jyly Qazaqstandaǵy eń alǵash qurylǵan debat klýby. Klýb maqsaty Ál-Farabı atyndaǵy QazUÝ stýdentteri arasynda debat oıynyn damytý jáne nasıhattaýǵa, ıntellektýaldy, ultjandy jastardy qalyptastyrýǵa negizdelgen.
«Adyrna» ulttyq portaly
