Almaty qalalyq polisiia departamentı düisenbıde aitys aqyny Rinat Zaiytov ūstalǧannan keiın bolǧan jaitqa bailanysty tüsınıkteme berdı.
Polisiia departamentı Facebook paraqşasynda jariialaǧan habarlamasyndadüisenbı künı keşke qarai Alatau audanynda rūqsat etılmegen mitingıden ūstalyp, polisiiaǧa jetkızılgen Rinat Zaiytovpen tüsındıru jūmysyn jürgızgennen keiın ony üiıne qoia bergenın aitady.
"Arada bıraz uaqyt ötkende polisiia departamentınıŋ aldyna bır top adam jinalyp, Rinat Zaiytovpen kezdesudı talap ettı. Olarǧa Zaiytovtyŋ üiıne ketkenı aitylǧanymen jinalǧandar tarauǧa asyqpady" delıngen habarlamada.
Polisiianyŋ aituynşa, bilık organdarynyŋ sūrauymen Rinat Zaiytov özımen kezdesudı talap etıp jinalǧan azamattarǧa jolyǧyp, "zaŋdy būzbauǧa jäne qūqyq qorǧau organdarynyŋ zaŋdy talabyn oryndauǧa" şaqyrǧan.
Rinat Zaiytov düisenbı künı saǧat 23:00 şamasynda polisiia departamentı maŋyna özın qoldap jinalǧandarmen kezdesıp, olardyŋ tarauyn ötıngennen keiın kölıgıne otyryp ketıp qalǧany turaly Azattyq habarlaǧan.
Arada bıraz uaqyt ötkende Almatyda polisiia Töle bi köşesınıŋ boiynda ondaǧan adamdy ūstaǧany turaly aqparat tarady. QazTAG agenttıgınıŋ habarlauynşa, "Alǧa, Rinat!", "Jasa, Qazaqstan!" dep aiǧailaǧan adamdar mıngen ondaǧan avtokölık kollonnasyn polisiia men arnaiy jasaq quyp jetıp, toqtatqan. Keiın polisiia men Ūlttyq ūlan sarbazdary "Sairan" avtovokzaly maŋynda adamdardy ūstai bastaǧan.
Almaty qalalyq polisiia departamentı äzırge būl oqiǧa turaly tüsınıkteme bergen joq.
10 mausymda Almatyda keşkı saǧat 18.00 şamasynda Bauyrjan Momyşūly - Tūrar Rysqūlov köşelerı qiylysyndaǧy Alatau teatry maŋyna bır top adam jeksenbı künı elde ötken kezekten tys prezident sailauynyŋ resmi aldyn ala qorytyndysyna narazylyq bıldırgen. Polisiia ol jerden ūstap äketken ondaǧan azamattyŋ arasynda aitysker Rinat Zaiytov ta bolǧan.
"Azattyq" radiosy
