Búgin fýtbol jankúıerleri áıgili Krıshtıaný Ronaldýny Tájikstan astanasy Dýshanbede kútip edi. «Vıza aldy» degeli onyń jolyna qarap kózi talǵandar kóp bolǵan. Erteń Dýshanbede Tájikstannyń «Istıqlol» komandasy Saýd Arabııasynyń «Ál-Nasr» komandasymen kezdesedi.
AFK (Azııa fýtbol konfederaııasy) 2023/24 maýsymyndaǵy Chempıondar lıgasynyń toptyq kezeńiniń altynshy týrynda Tájikstannyń «Istıqlol» komandasymen Saýd Arabııasynyń «Ál-Nasr» komandasymen kezdesedi. Alaıda sońǵy sátte kópshilik kútken áıgili fýtbolshy Krıshtıaný Ronaldýnyń Dýshanbege kelmeıtini belgili boldy. «E» tobyndaǵy fýtboldan Tájikstan men Saýd Arabııasynyń chempıondary arasyndaǵy sońǵy týr oıyny seısenbi, 5 jeltoqsan kúni Dýshanbeniń Ortalyq stadıonynda saǵat 21:00-de bastalady.
KRIShTIANÝ TÁJIKSTANǴA KELÝDEN NEGE BAS TARTTY?
«Istıqlol» fýtbol klýbynyń baspasóz hatshysy Rýstam Hakımov 30 qarashada Ortalyq stadıonnyń kassalarynda atalǵan matchqa 10 myńnan astam bılet satylyp ketkenin aıtty. Halyq Ronaldýny Dýshanbege keledi dep kútken. Onyń osy sapary úshin vızasy berilgeni de habarlanǵan.
Biraq búgin Ronaldýnyń kelmeıtini jaıly aqparatty «Azııa-Plıýs» agenttigine «Istıqlol» fýtbol klýby rastady.
Football-fun-live.com saıty AFK Chempıondar lıgasynyń sońǵy týrynda «Istıqlolmen» matchta Krıshtıaný Ronaldýnyń esimi joq ekenin jazdy.
Varzish sport arnasynyń habarlaýynsha, Ronaldýnyń ırandyq «Persepolıske» qarsy oıynda alǵan jaraqaty onyń bul kezdesýge qatysýyna kedergi bolǵan.
«Dýshanbedegi ortalyq stadıonda oıynǵa bıletter úsh sanat boıynsha satylady. Batys stendine birinshi sanattaǵy bılettiń baǵasy 300 somonı (27 dollar shamasynda) turady. Qalǵan trıbýnalar úshin ekinshi sanattaǵy bılet baǵasy – 100 somonı (9 dollar shamasy). Quny 3000 (274 dollar) somonı turatyn VIP bıletter de bar», - degen áýelde Rýstam Hakımov.
E tobyndaǵy ırandyq «Persepolıs» pen qatarlyq «Ad-Dýhaıl» arasyndaǵy ekinshi oıyn da 5 jeltoqsanda Tegerandaǵy «Ozodı» stadıonynda ótedi.
Eske salaıyq, 2 qazan kúni Saýd Arabııasynyń Er-Rııad qalasyndaǵy «Al-Aval Park» stadıonynda ótken toptyq týrnırdiń ekinshi aınalymyndaǵy «Ál-Nasr» men «Istıqlol» arasyndaǵy birinshi oıynda «Istıqloldyń» qarsylastary 3:1 esebimen jeńiske jetken bolatyn. Bul oıyndy keıin teledıdardan 200 mıllıonnan astam kórermen tamashalady. Bul – Azııa chempıondar lıgasynyń tarıhyndaǵy rekordtyq kórsetkish.
«ÁL-NASR» PLEI-OFFTA
Qazirgi ýaqytta E tobynyń týrnırlik kestesinde «Ál-Nasr» komandasy 13 upaımen birinshi orynda tur. «Ál-Nasr» osy topta merziminen buryn birinshi orynǵa shyǵyp, bıylǵy maýsymdaǵy Chempıondar lıgasynyń pleı-off kezeńine joldama aldy.
Ekinshi orynda 8 upaımen ırandyq «Persepolıs» tur. Bul komandanyń kelesi kezeńge ótý múmkindigi áli de bar. Qatardyń «Ad-Dýhaıl» komandasy 4 upaımen úshinshi orynda. Sońǵy orynda 2 upaımen Tájikstannyń «Istıqloly» tur. Bul eki komanda da osy maýsymda odan ári básekege túsý múmkindiginen aıyryldy.
«ISTIQLOL» TEŃ ESEP KÓRSETEDI»
Fýtbol sarapshylary azııalyq teketirestegi halyq nazaryndaǵy matchqa baǵa berip úlgerdi. Olar tájikter óz alańynda Ronaldýnyń quramasyna basymdyq bermeıdi dep otyr.
Dýshanbe quramasynyń bas bapkeri Igor Cherevchenko aldyńǵy match týraly:
«Balalyq qateliktiń saldarynan eki birdeı jáne uıattaý gol jiberip aldyq. Oıynǵa kelsek, jigitterge ókpem joq. Matchta gol soǵatyn jaqsy múmkindikterimiz de boldy. Biraq, ókinishke qaraı, olardy júzege asyrý múmkin bolmady» dedi ol.
Tájikstan quramasynyń burynǵy oıynshysy, qazirgi bapker Hıkmat Fýzaılov «Istıqlol» men «Ál-Nasr» kezdesýi teń aıaqtalady deıdi:
«Dýshanbe stadıonynyń jasandy alańy men jankúıerlerdiń qoldaýy sııaqty faktorlar da teń nátıjedegi oıyndy sıpattaıdy. Onyń ústine tapsyrma oryndaldy, komanda toptan birinshi orynmen shyǵyp tur. Biraq «Istıqlol» óz namysy, jankúıerleri úshin kúresedi, bul sózsiz. Nátıjesinde teń oıyn bolady», - dep boljamyn túıindedi Fýzaılov.
Eske sala keteıik, Krıshtıaný Ronaldýnyń bıylǵy qyrkúıek aıynda Tegeranǵa kelýi jergilikti jankúıerler arasynda úlken shýǵa ulasqan edi.
Myńdaǵan jankúıer Iran astanasyn lyq toltyryp, jol boıynda jáne portýgaldyq fýtbolshy turǵan qonaqúı mańyn torýyldaǵan bolatyn. Óz kýmırlerin tirideı kóretinine senbegen ırandyq jankúıerleri kóz jastaryna erik bergen edi. Al Rýdakıdiń eline keledi degen Rýnaldýnyń sońǵy sátte kelmeıtini belgili boldy.
Dına LITPIN,
«Adyrna» ulttyq portaly
