Májilis depýtaty Dáýlet Turlyhanovtyń inisi, 2000 jyldary tanymal bolǵan qazaqstandyq ánshi Rahat Turlyhanov áıelin uryp-soqqany úshin úshin eskertý aldy. Bul týraly Almaty qalalyq soty málimdedi, dep habarlaıdy “Adyrna” ulttyq portaly.
Sotta belgili bolǵandaı, 2023 jyldyń jeltoqsan aıynda Rahat Turlyhanov úıinde janjal shyǵaryp, áıelin soqqyǵa jyqqan. Sot otyrysynda ol óz kinásin moıyndap, istegen isine ókinitinin jetikizdi. Sondaı-aq, tatýlasqandaryn aıtyp, sottan isti toqtatýdy surady.
Áıeli is materıaldarynda kórsetilgen faktilerdi rastap, Turlyhanovpen tatýlasqanyn habarlady.
Zań talabyna sáıkes, ıaǵnı Ákimshilik quqyq buzýshylyq týraly kodeksiniń 73-2 baby (1-1 b.) boıynsha kózdelgen ákimshilik quqyq buzýshylyq úshin jaza - eskertý nemese 10 táýlikke ákimshilik qamaqqa alý.
«Sot qaýlysymen T., ÁQBtK-niń 73-2 baby 1-1 bóligi boıynsha ákimshilik quqyq buzýshylyqty jasaǵany úshin kináli dep tanylyp, ol eskertý túrindegi ákimshilik jazaǵa tartyldy», - dep habarlady qalalyq sottan.
Sot qaýlysy zańdy kúshine engen joq.
Eske sala keteıik, byltyr kúzde de Rahat Turlyhanov áıelin uryp-soqqany úshin ákimshilik quqyqbuzýshylyq boıynsha sotqa shaqyrylǵan, biraq áıeli ony keshirgendikten, bir kezderi tanymal bolǵan ártis jazadan qutylǵan edi.
