“Habar” telearnasynyń bas prodıýseri Dastan Shymyrbaı qyzmetinen ketpek. Bul týraly ol Azattyq radıosyna aıtty, dep habarlaıdy “Adyrna” ulttyq portaly.
Aıta keteıik, 13 naýryz memlekettik "Habar" arnasynyń "Biraq..." tok-shoýy uzaq ýaqyt kúıeýinen zábir kórgen áıeldi efırde shaqyryp, kúıeýine qospaq bolǵany úshin synǵa qaldy. Rezonans týdyrǵan baǵdarlama ashylmaı jatyp, birden jabyldy.
QR Mádenıet jáne aqparat mınıstri Aıda Balaeva jelidegi paraqshasynasyna "Biraq..." baǵdarlamasy týraly resmı málimdeme jasap, "tok-shoý jabylady" dep málimdedi.
Al 14 naýryzda "Habardyń" bas prodıýseri Dastan Shymyrbaı Azattyqqa osy shýǵa baılanysty qyzmetten ketip jatqanyn, "redakııa qateleskenin, jaýapkershilikti moınyna alatynyn" aıtty.
«Baǵdarlamada tırandy áıelimen tabystyrý degen oıymyz bolmady, tek eki tarapty [habarǵa] shaqyrý degen oıymyz bolǵan. Dırektor ákimshilik jumystarmen aınalysady, men efırden ótetin habarlardyń mazmunyna jaýap beremin. Keshegi jaǵdaıdan soń basshylyqqa baryp, jumystan ketetinimdi aıttym. Aryz jazdym. Eshkim májbúrlegen joq. Qazir jumystan ketý qaǵazyn toltyryp júrmin», - dedi arnanyń bas prodıýseri Azattyqqa bergen suhbatynda.
Al baǵdarlama keıipkeri "Habar" arnasyn zań júzinde jaýapqa tartqysy keledi.
