Lıtvanyń Kaýnas qalasynda bokstan ótken Algırdas Shoıkas atyndaǵy halyqaralyq týrnırdiń fınalynda Qazaqstan quramasynan toǵyz boksshy sharshy alańǵa shyǵyp, onyń altaýy altyn medal ıelendi. Bul týraly Qazaqstan boks federaııasy málimdedi, dep habarlaıdy “Adyrna” ulttyq portaly.
Málimet boıynsha, 57 kelige deıingi salmaqta Asyljan Serikbaı ýkraınalyq Denıs Rozdolskıdi eki ret nokdaýnǵa jiberip, aıqyn basymdyqpen utty.
- 63,5 keli salmaqta ırlandııalyq Paýl Heıl Djon jekpe-jekten bas tartyp, Jandos Qydyrálıev taǵy bir altyn medaldy ıelendi.
- 67 keli salmaqta Elnur Súıinbaı Polsha ókili Kırıll Globenkodan basym tústi.
- 71 keli salmaqta otandasymyz Farýh Toqtasynov sońǵy jekpe-jeginde ýkraınalyq Maksım Molodanny jeńip ketti.
- 75 keli salmaqta Azamat Bektas taǵy bir Polsha ókili Mıhal Iarlınskıdi san soqtyrsa, 80 keli salmaqta Tursynbaı Qulahmet brıtandyq Ramtın Mýsadan basym ekenin dáleldeı aldy.
Al sheshýshi jekpe-jekte Nursultan Altynbek (54 kg), Almat Ábdýálı (60 kg) jáne Abzal Quttybekov (86 kg) tóreshiler sheshimimen qarsylastaryna jol berdi.
Osylaısha, jerlesterimiz atalǵan halyqaralyq týrnırde 6 altyn, 3 kúmis, 2 qola medalge ıe boldy.
