Batys Qazaqstan oblysynyŋ joǧary synyp oquşylary arasynda «Men bolaşaq käsıpkermın» baiqauy dästürlı türde ötıp keledı. Baiqau BQO Käsıpkerler palatasynyŋ alaŋynda törtınşı märte Batys Qazaqstan oblysy bılım basqarmasy, oblystyq Käsıpkerler Palatasy men «AMANAT» partiiasynyŋ oblystyq filialynyŋ qoldauymen, «Daryn» qosymşa bılım ortalyǧynyŋ ūiymdastyruymen ozdyrylyp otyr.
Jobanyŋ avtory Oral qalalyq mäslihatynyŋ deputaty, «AMANAT» partiiasy oblystyq filial janyndaǧy Otbasy jäne halyqty äleumettık qorǧau jönındegı keŋes töraiymy Äzima Ǧūbaşeva. Öŋırlık käsıpkerler palatasy būl bastamany qoldap, BQO käsıpkerler palatasynyŋ direktory Maqsat Qūlanbaev qazylar alqasynyŋ qūramynan tabyldy. Audandyq jäne qalalyq kezeŋnen ötken 12 jūmys oblystyq baiqauǧa qatysty. Oquşylardyŋ biznes-jobalarynyŋ mazmūny erekşe boldy. Balalar qarapaiym qoidyŋ qūiryq maiynan taza ekologiialyq önım alu jäne satu, barberşop salonyn aşu, gipsten būiymdar jasau baǧytynda tyŋ bastamalarymen bölıstı.
– Atalmyş baiqau – oquşylarǧa käsıptık baǧdar beru ortalyǧymen bırge ötkıze bastaǧan käsıbi deŋgeidegı mekteptıŋ käsıptık baǧdar beru jūmysynyŋ bırınşı kezeŋı. Joba jastardy mektep qabyrǧasynan bastap naryqtyq ekonomika qaǧidattaryna üiretuge baǧyttalǧan. Bızdı qyzyqtyrǧan taqyryptar boldy. Mysaly, qūiryq maidan önımdı qalai aluǧa bolatyny, qalai satatyny turaly, ekologiialyq baǧyttaǧy jobalar, mekteptegı kino, mektep jaǧdaiyndaǧy chat-bot, konditerlık būiymdar şyǧaru taqyryptarynda oquşylar audandyq, qalalyq deŋgeidegı baiqaulardyŋ jeŋımpazy retınde jūmystaryn jürgızıp otyr, – deidı joba avtory Äzima Zinnatqyzy.
Oral qalasy, №42 «Aq niet» gimnaziiasynyŋ 10 synyp oquşylary Nūrsezım Dauylbai men Ädemı Ahmettıŋ «Qūiryq maidan taza ekologiialyq önım alu jäne satu» biznes jobasy qazylar alqasyna öte ūnady. Sarapşylar biznes-jobanyŋ sauatty ūsynyluyn ǧana emes, onyŋ sapaly mazmūnyn da atap öttı.
– Qoidyŋ maiy myŋ auruǧa em. Qūiryq mai tarihtan berı ata-babamyz kündelıktı tūrmysta qoldanyp kele jatqan qorektık quaty mol, şipalyq qasietı zor, ūrpaqtan-ūrpaqqa jalǧasqan qasiettı azyqtardyŋ bırı. Köptegen jyldar boiy maidy köptegen aurulardy, äsırese suyq tiiudı emdeu üşın dästürlı medisina resepterınde qoldanady. Qūiryq maidyŋ kömegımen traheit, bronhit, bronhopnevmoniia siiaqty tynys alu joldarynyŋ aurulary da sättı emdeledı. Sondai-aq terını jaqsartady. Terı kütımıne jaǧatyn jaqpa maiǧa badam, kastor maiy, hoş iıstendırgış lavanda jäne qūiryq maiy qosylǧan. Osylaişa erıtılgen qūiryq maidan jeke brendımızdı jasap şyǧarǧymyz keledı. Bes türlı önımdı satyp kördık. Qūiryq maidy satuǧa arnaiy insta paraqşa aştyq, – deidı bolaşaq käsıpkerler. Qos boijetkennıŋ atalmyş jobasy baiqaudyŋ eŋ üzdık jobasy dep tanyldy.
Sarapşylar «Ali Barberrs» barberşop salony» biznes jobasyn ūsynǧan Qaratöbe audany Q.Jūmaliev atyndaǧy Qaratöbe mektep-gimnaziiasynyŋ 10 synyp oquşysy Äli Karimov pen Jaŋaqala audanyndaǧy №3 orta mektebınıŋ 10 synyp oquşysy Diliara Äbılqasymovanyŋ «Ekoönımder» biznes jobasyn ekınşı orynǧa laiyq sanady.
Aqjaiyq audany Y.Altynsarin atyndaǧy JOBBM-nıŋ 10 synyp oquşysy Kämila Talǧatqyzynyŋ «Tasty cake üi pısırmelerı», Bäiterek audany Abai atyndaǧy mektep-gimnaziia internatynyŋ 10 synyp oquşysy Adabai Serıkjannyŋ «CHATBOT – zaman talaby», Börlı audany, Aqsai qalasynyŋ №7 orta mektebınıŋ 10 synyp oquşysy Aiaulym Lesovanyŋ «Trendtegı tauar gipspen jasalǧan būiymdar» biznes jobalary üşınşı orynnan körındı.
– Biznes jobanyŋ jaŋaşyldyǧy – säikestıgı men bezendırıluı, jas buynnyŋ zerttegen salasyn jetık meŋgeruınde boldy. Bizneske erte jastan bet būrǧany öte dūrys, sebebı ekonomikanyŋ negızgı qozǧauşy küşı käsıpkerlık. Sol üşın mūndai jobalardyŋ maŋyzy zor, – deidı BQO käsıpkerler palatasynyŋ direktory Maqsat Qūlanbaev.
Biznes joba baiqauyn «Baqytty otbasy» partiialyq joba aiasynda «Alem Qoldau» qoǧamdyq bırlestıktıgı qarjylandyryp, jeŋımpazdarǧa diplomdar men baǧaly syilyqtar tabystaldy.
Aita ketu kerek, qazırgı taŋda «Käsıpkerlık jäne biznes negızderı» pänınıŋ oqu baǧdarlamasyna engızıluı nätijesın berude. Oquşylar sabaqta biznestıŋ qyr-syryn tereŋ meŋgerıp, biznes jospar qūryp, şyǧyn men tabys kölemın esepteuge daǧdylanady, qarjylyq sauattylyǧy artady. Bügınde öŋır jastary qanatqaqty jobalar oilap tauyp, bizneske qadam basuda.
