Aqkól qalasynda Keńes Odaǵynyń Batyry, Halyq Qaharmany, táýelsiz Qazaqstannyń tuńǵysh Qorǵanys mınıstri, armııa generaly Saǵadat Nurmaǵambetovtiń 100 jyldyq mereıtoıyna arnalǵan saltanatty is-shara ótti. Oǵan Memleket basshysy Qasym-Jomart Toqaevtyń tapsyrmasymen Senat Tóraǵasy Máýlen Áshimbaev qatysty.
Sondaı-aq Saǵadat Nurmaǵambetov eskertkishiniń ashylý rásimine Qorǵanys mınıstri Rýslan Jaqsylyqov, Aqmola oblysynyń ákimi Marat Ahmetjanov, batyrdyń qyzy Aısulý Nurmaǵanbetova, Qarýly kúshterdiń ardagerleri, Halyq Qaharmany, otstavkadaǵy armııa generaly Muhtar Altynbaev, Halyq Qaharmany, otstavkadaǵy general-leıtenant Baqytjan Ertaev, Keńes Odaǵynyń Batyry, Halyq Qaharmany, otstavkadaǵy avıaııa general-maıory Toqtar Áýbákirov, elordadaǵy áskerı kolledjdiń kýrsanttary, Aqmola garnızonynyń áskerı qyzmetshileri, Saǵadat Nurmaǵambetovtiń jaqyndary jáne qala turǵyndary qatysty.
Is-sharaǵa qatysýshylar áskerıler rotasynyń qurmet qaraýylynyń jáne Qarýly kúshterdiń Ulttyq áskerı-patrıottyq ortalyq orkestriniń súıemeldeýimen dańqty batyrdyń eskertkishine gúl shoǵyn qoıyp, rýhyna taǵzym etti.
Saltanatty rásimde Máýlen Áshimbaev jurtshylyqqa Memleket basshysy Qasym-Jomart Kemeluly Toqaevtyń quttyqtaý hatyn oqyp berdi. Sondaı-aq ol Saǵadat Nurmaǵambetovtiń ónegeli ómiri óskeleń urpaqqa árdaıym úlgi ekenin jáne batyrdyń esimi el tarıhyna máńgige jazylǵanyn atap ótti.
«Qazaqstannyń alǵashqy armııa generaly Saǵadat Nurmaǵambetov búkil sanaly ǵumyryn áskerı qyzmet salasyna arnady. Memleketimizdiń tuńǵysh Qorǵanys mınıstri retinde aıbyndy armııamyzdy qurýǵa jáne ony nyǵaıtýǵa zor úles qosty. Ol óziniń bolmys-bitimimen, ómirlik ustanymymen jáne aqyl-parasatymen qazaq generalynyń naǵyz úlgisine aınaldy. Batyrdyń eskertkishi – halyqtyń qaharman ulyna ystyq yqylasynyń, Otanǵa qorǵaýǵa ómirin arnaǵan barsha azamatqa shynaıy qurmetiniń belgisi. Saǵadat Nurmaǵambetovtiń «Beıbit kúndi qyraǵy kúzetińder!» degen sózi bar. Bul – tek sarbazdarǵa emes, ár otandasymyzǵa júktelgen amanat. Ony oryndaý – bárimizdiń perzenttik paryzymyz», – delingen el Prezıdentiniń quttyqtaý hatynda.
Óz sózinde Senat Spıkeri genaraldyń erligi men elge sińirgen eseli eńbegi árdaıym halyqtyń jadynda saqtalatynyn aıtty. Sondaı-aq ol kórnekti memleket jáne qoǵam qaıratkeriniń ómiri men sońynda qalǵan rýhanı murasyn dáripteý mańyzdy is ekenin, mundaı qadam ulttyq biregeılikti nyǵaıta túsetinin tilge tıek etti.
Batyrdyń qyzy Aısulý Nurmaǵambetova ákesi búkil ǵumyryn Otanǵa qyzmet etýge arnaǵanyn aıtyp, estelikterimen bólisti. Sonymen birge ol ıgilikti iske uıytqy bolǵan azamattarǵa jáne eskertkishtiń avtory Aıdos Búrkitbaevqa alǵysyn bildirdi.
Jas sarbazdar dańqty qolbasshyǵa qurmet kórsetip, áskerı orkestrdiń súıemeldeýimen eskertkish aldynan sap túzep ótti.
Aıta keteıik, Saǵadat Nurmaǵambetov 1924 jylǵy 25 mamyrda Aqmola oblysynyń Eńbek aýylynda dúnıege kelgen. Ol – áskerı kolledjdiń kýrsantynan armııa generalyna deıin, pýlemetshiler vzvodynyń komandırinen táýelsiz Qazaqstannyń Qorǵanys mınıstrine deıingi joldy júrip ótken biregeı tulǵa. Saǵadat Qojahmetulynyń eren erligi men qaısarlyǵy KSRO-nyń, Qazaqstan Respýblıkasynyń jáne taǵy basqa memleketterdiń 16 ordenimen jáne 30 medalmen marapattaldy.
