Oral qalasynyŋ «Atameken» öner ordasynda «Aqjayiq Fashion Festival» sän festivalınıŋ III mausymy «Ūlttyq kiım – ūrpaqqa mūra» atauymen öttı.
Jeŋıl önerkäsıp qyzmetkerlerı künıne arnalǧan sän körsetılımıne sonau Türkiia elıne belgılı dizainer, «Art Fashion Week Europe» negızın qalauşy Aidyn Achik, Qyrǧyzstan dizainerler assosasiiasynyŋ belsendı ökılı Nūrzat Jeenbek, RF Tatarstan Respublikasynan kelgen delegasiiany bastauşy Qazan memlekettık öner-mädeniet institutynyŋ dosentı, Euraziialyq etno-dizainerler qauymdastyǧynyŋ müşesı Rasyh Salahov, halyqaralyq sän aptalyqtarynyŋ qatysuşysy Elvina Davlieva, qazandyq «Navruz» sän kolleksiiasynyŋ jas dizainerı Nailia Burganova jäne elımızdıŋ Astana, Taraz, Aqtöbe, Atyrau, Şymkent qalalarynan kelgen qonaqtar qatysty. Saltanatty ıs-şarada öŋırdegı dizainer mamandar da boi körsettı. Sondai-aq atalmyş salaǧa qyzyǧuşylyǧy bar jastar da tamaşalauǧa jinaldy. Şara barysynda oblystyq qoǧamdyq damu basqarmasynyŋ basşysy Güljanar Şökeeva qadırlı qonaqtarǧa rizaşylyǧyn bıldırıp, festivaldıŋ III mausymynyŋ aşyluymen qūttyqtady.

– Aq Jaiyq öŋırı – Europa men Aziianyŋ altyn köpırı ıspettı. Mūnda talai jyraular men aqyndar, öner tarlandary men batyrlar meken etıp, azattyqtyŋ aq taŋy üşın küresken. Būl festival biyl erekşe ataumen ötude. Jalpy ūlttyq kiım – ūltymyzdyŋ ainasy. Qazaqtyŋ ūlttyq kiımı halyqtyŋ tamyryn tereŋge jaiǧan qoldanbaly önerınıŋ sarqylmas qazynasy ekenın aŋǧaruǧa bolady. Jahandanu zamanynda ūlttyq bolmysymyzdy saqtap qalu üşın öz kiımderımızdı därıpteu jäne sol arqyly salt-dästür, ädet-ǧūrpymyzdy keŋınen nasihattau öte maŋyzdy. Memleket basşysy Qasym-Jomart Toqaevtyŋ tapsyrmasy aiasynda Nauryz meiramyn toilaudyŋ jaŋa formaty şeŋberınde 18 nauryz – Ūlttyq kiım künı bolyp belgılengenı barşaǧa belgılı. Dana Abaidyŋ «Kiım kiiu salty arqyly adamnyŋ mınez-qūlqy, qoǧamdaǧy orny, bolmysy anyqtalady» degen sözı bar. Bügınde ūlttyq kiım sän-saltanaty jaǧynan älemde moiyndalǧan brendke ainalyp otyr. Osy rette özge memleketterden qazaqstandyq dizainerler qauymdastyǧyn qoldap kelgen qonaqtarǧa alǧys aitamyn. Ūlttyq kiım – bızdıŋ ūlttyq nyşanymyz, – dedı Güljanar Bolatqyzy.
Aita keteiık, atalǧan festivaldıŋ alǧaşqy mausymynda Qyz Jıbek obrazy keŋınen därıptelgen bolsa, kezektı ekınşı jylda Taqsai hanşaiymy jäne biyl Jäŋgır han men Fatima beinelerı negızge alynǧan. Sän körsetılımınde jinalǧan jūrttyŋ nazaryna türlı obrazdar, iaǧni 22 kiım toptamasy ūsynyldy. Är toptama özgeşe baǧytymen autordyŋ qiialy men eŋbegınen habar berıp otyrǧandai boldy. Sondai-aq arasynda «Otbasy» taqyrybyndaǧy kompozisiia qoiylyp, tamaşalaǧandarǧa oi salyp, ūlttyq qūndylyqtardy nasihattady. Ondaǧy ūlttyq kiım men şaŋyraqtyŋ ülgısı belgılı bır uaqyttan nemese zamannan syr şertıp tūrǧandai äser qaldyrdy.
Şaŋyraqtyŋ biık, keregenıŋ keŋ jäne bosaǧanyŋ berık boluyna yqpal etetın adami qasietter men ūlttyq tärbienıŋ maŋyzy körsetıldı. Otbasyndaǧy äkenıŋ bolmysy men orny, ananyŋ şeksız meiırımı häm balanyŋ ata-anaǧa qarap boi tüzeuı obrazdar arqyly berılıp, qazaqy tanym-tüsınıktıŋ tereŋdıgın däleldei tüstı.

Amanjol İSLAMǦALİ