«QazMūnaiGaz» ūlttyq kompaniiasy eldıŋ energetikalyq qauıpsızdıgın qamtyp qana qoimai, äleumettık jobalarǧa da qomaqty qarajat böledı. Kompaniianyŋ jaqynda jariialanǧan jyldyq esebıne köz jügırtsek, öndırıstık käsıporyndary ornalasqan öŋırlerdı äleumettık qoldauǧa jäne jalaqyǧa byltyr 640 mlrd teŋgeden astam qarjy bölıptı. Būl negızgı aksionerı Qazaqstan Ükımetı bolyp esepteletın kompaniianyŋ joǧary äleumettık jauapkerşılıgın, sondai-aq el ekonomikasyndaǧy airyqşa rölın aiqyndaǧandai.
«QazMūnaiGaz» bügınde özınıŋ enşıles kompaniialarynda 50 myŋǧa juyq adamdy jūmyspen qamtyp otyr. Byltyr ūlttyq kompaniia qūramyna kıretın ūiym qyzmetkerlerınıŋ jalaqysyna jūmsaǧan şyǧysy 2022 jylmen salystyrǧanda 16%-ǧa ösıp, 612 mlrd teŋgege jetken. Oǧan qosa kompaniia öz qyzmetkerlerıne kepıldı äleumettık paket berıp keledı. Būǧan sauyqtyru şaralary, materialdyq kömek, türlı ötemaqy men tölem, medisinalyq saqtandyru, qyzmetkerler men olardyŋ balalarynyŋ demalysyn ūiymdastyru, t.b. äleumettık qoldaular kıredı. Ötken jyldyŋ özınde mūndai şaralarǧa 27 mlrd teŋge jūmsalǧan.
Sonymen qatar «QazMūnaiGaz» kompaniianyŋ merdıger mekemelerınıŋ qyzmetkerlerı üşın qandai jaǧdai jasalatyny turaly ünemı esep berıp otyrady. Tenderde ūtylǧan kompaniia qyzmetkerlerınde jūmyssyz qalu qaupı tuǧanda «QazMūnaiGaz» kömegımen sol mamandar tenderde ūtqan kompaniiaǧa jūmysqa ornalasqan kezı de boldy. Būdan bölek, merdıger ūiym jūmysşylarynyŋ jalaqysyna indeksasiia jürgızıp, olar üşın kepıldı äleumettık paket engızgen. Soŋǧy derekter boiynşa bır adamǧa şamamen 550 myŋ teŋge bölınıptı. Osylaişa, kompaniia nysandarynda qyzmet körsetetın merdıger ūiymdarda 28,7 myŋ adamǧa jūmys ornyn aşqan. Onyŋ 22 myŋǧa juyǧy Maŋǧystau oblysynda eŋbek etedı.
Ūlttyq kompaniianyŋ mūnai öndıruden tüsken kırısı türlı jolmen halyq igılıgıne jūmsalyp, özıne qaitady. Iаǧni «QazMūnaiGaz» äleumettık nysandar tūrǧyzyp, qaiyrymdylyqpen ainalysady, adamdarǧa investisiia salady. Osylaişa, kompaniianyŋ enşıles ūiymdary jer qoinauyn paidalanuǧa arnalǧan kelısımşartpen öz qyzmetın jürgızetın öŋırlerdı damytuǧa qarjy bölıp otyr. Sondai-aq oblys äkımdıkterımen jeke memorandum jasalǧan. 2025 jylǧa deiın «QazMūnaiGaz» özınıŋ enşıles kompaniialary arqyly sol öŋırlerde jalpy qūny 28 mlrd teŋgege juyq äleumettık infraqūrylym jobalaryn ıske asyryp, qarjylyq kömektıŋ basqa da türlerın körsetpek. Balabaqşa, oquşylar saraiy, mektep, jataqhana, medisinalyq ortalyq, saiabaq, taǧy basqa da ǧimarattardyŋ qūrylysyn jürgızudı josparlaǧan.
Būǧan qosymşa kompaniia Samruk-Kazyna Trust («Samūryq-Qazyna» AQ kompaniialar tobynyŋ qaiyrymdylyq qyzmetınıŋ bıryŋǧai operatory) äleumettık jobalardy damytu qory arqyly qaiyrymdylyq, demeuşılık jobalarǧa qarjy qarastyryp keledı. Byltyr biudjetten qarjylandyrylǧan jobalar portfelınde 46 joba bar, onyŋ ışınde kompaniia qajettılıkterın eskere otyryp, tört jobany ıske asyrǧan.
Qarjylyq qoldaularǧa mysal keltırsek. Ūlttyq kompaniia Maŋǧystau oblysy, Jaŋaözen qalasy men Qaraqiia audanynyŋ äleumettık infraqūrylymyn damytuǧa – 1,7, Atyrau oblysy Besıktı auylynda – 280 oryndyq balabaqşa saluǧa – 783 mln, Maŋǧystau oblysynyŋ äleumettık-ekonomikalyq damuy, infraqūrylymyn damytuǧa 455 mln teŋge bölgen. Qyzylorda oblysynda 350 adamǧa arnalǧan oquşylar saraiyn tūrǧyzuǧa – 2,3 mlrd, Aqtöbe oblysynyŋ äleumettık-ekonomikalyq damuy jäne onyŋ infraqūrylymyna 395 mln teŋge qarjy qarastyrypty. Oral qalasynda köpfunksionaldy sporttyq sauyqtyru keşenın saluǧa 19,3 mlrd, Atyrau, Maŋǧystau, Aqtöbe, Qyzylorda, Türkıstan, Pavlodar oblysyndaǧy jergılıktı qoǧamdastyqtaryna qaiyrymdylyq kömek üşın 1,1 mlrd teŋge jūmsaǧan. Sondai-aq byltyrǧy jyldyŋ biudjetınen «Jarqyn bolaşaq» bılım jobasyna 678 mln, Maŋǧystau oblysy, Tüpqaraǧan audany, Aqşūqyr auylynyŋ därıger ambulatoriiasyna rentgen apparatyn satyp aluǧa 36,5 mln, osy oblysqa qarasty Jetıbai men Jaŋaözen qalalarynda balalarǧa arnalǧan 21 sport alaŋynyŋ qūrylysyna 1 mlrd teŋge bölıptı.
Būdan bölek, «QazMūnaiGaz» Jaŋaözende mūnai-gaz klasterın qalyptastyruǧa da kömektesıp keledı, iaǧni ūlttyq kompaniia – tapsyrys beruşı bolsa, al jeke käsıporyndar – öndırıske qajettı jabdyqty öndıruşı. Kompaniia Jaŋaözende mūnai-gaz jabdyqtaryn öndıretın jeke investorlardy tartyp, sol käsıporyndardyŋ önımın öz kompaniialaryna satyp aluǧa niet etıp otyr. «Özenmūnaigaz» AQ men «QazMūnaiGaz» kompaniiasynyŋ basqa da enşıles ūiymdary öndırıske qajettı jabdyqtardyŋ tızımın de daiyndaǧan. Būl jaŋaözendıkter üşın jaŋa jūmys oryndaryn aşuǧa mümkındık bermek.
Aldaǧy uaqytta Jaŋaözende mūnai men gaz öndıruge qajettı tauarlar şyǧaratyn jaŋa zauyt boi köteredı. Biyl säuır aiynda bolaşaq käsıporynnyŋ ırgetasyn qalau räsımı öttı. Zauyt jylyna 51 myŋ tonna qūbyr önımderın, 540 myŋ sorǧy ştangalaryn, 100 mūnai jylytqyştaryn öndıretın bolady. Sondai-aq qala tūrǧyndaryna 250-den astam jaŋa jūmys orny aşylady dep josparlanǧan.
