Uaqytty bır saǧatqa özgertu men densaulyqqa aitarlyqtai äserı arasynda eşqandai bailanys joq. Būl turaly Densaulyq saqtau ministrınıŋ bırınşı orynbasary Timur Sūltanǧaziev vedomstvo tarapynan būl mäsele boiynşa tiıstı jūmys tobyn qūrylǧanyn aitty, dep haarlaidy “Adyrna” ūlttyq portaly QazAqparatqa sıltep.
«Onyŋ qūramyna ǧalym mamandar men därıgerler, medisina ökılderı kırdı. Olar uaqyt beldeuın özgertu jönındegı şeteldık ǧylymi ädebiettı, özge elderdıŋ täjıribesın zertteu baǧytynda ülken jūmys atqardy. Osy zertteuler negızınde ǧalymdar jasaǧan qorytyndy boiynşa, uaqytty bır saǧatqa özgertu men densaulyqqa aitarlyqtai äserı arasynda eşqandai bailanys joq.
Sondai-aq, bız Düniejüzılık densaulyq saqtau ministrlıgıne de jügındık. Ondaǧy sarapşylar da osy mäselenı talqylau üşın öz pıkırlerın aitty. Jalpy ǧalymdar adam densaulyǧyna kün uaqytyna barynşa jaqyn uaqyt beldeuın tūraqty qoldanuǧa keŋes berıp otyr. New England Journal of Medicine basylymynda jariialanǧan zertteudı qysqaşa baiandap şyǧuǧa rūqsat etıŋızder. Zertteu qysqy jäne jazǧy uaqytqa 1 saǧat aiyrmaşylyǧymen köşu adamdardyŋ köpşılıgınıŋ densaulyǧynda aitarlyqtai būzylystarǧa äkelmeitının körsetken. Uaqyt özgerısıne aǧza belgılı bır uaqyttyŋ ışınde ūzaq merzımdı kerı äserlersız beiımdele alatyny aitylǧan», - dedı ol.
Vise-ministr uaqytty 1 saǧatqa jyljytu ūiqyny retteitın gormon – melatonin öndırısınde minimaldy özgerıster tuyndatady dep otyr.
«Journal of biological Britance-te jariialanǧan zertteu aǧza uaqyttyŋ mūndai jyljuyna 1-2 künde jäne bırneşe aida beiımdeletının körsettı. Jaŋa uaqyt kestesıne melatonin deŋgeiı tez beiımdelıp, qalypty ūiqy rejimın qamtamasyz ete alatyny aitylǧan. Taǧy da atap ötkım keledı, tolyqqandy zertteu jürgızuge tym az uaqyt öttı. Sonyŋ özınde osy kezeŋde medisinalyq ūiymdarǧa jügınuşıler sany eşqandai özgermegen. Halyqtyŋ densaulyq jaǧdaiy aitarlyqtai özgergen joq. Uaqyt beldeuı özgertılgennen berı qysqa ǧana kezeŋ ötkenın eskersek, basqa beldeuge köşudıŋ densaulyqtaǧy eleulı özgerısterge sebepker bolǧan-bolmaǧanyn anyqtau üşın tiıstı ǧylymi zertteuler kerek. Ministrlık ondai taldau mümkındıgın Ǧylym jäne joǧary bılım ministrlıgımen bırlesıp qarauǧa daiyn», - dedı Timur Sūltanǧaziev.
Ūqsas jaŋalyqtar
