Qarjy  piramidalaryn qalai anyqtaimyz?

Qarjy piramidasy-alaiaqtyqtyŋ eŋ köp taraǧan türı.  Äp, sätte baiyp, qyrauar qarjyny qaltaǧa basamyn degen qūr sözge aldanyp, kerısınşe soŋǧy tiynyn sanap beruge äkeletın,  äkkı qulardyŋ qūryq bailatpaityn jüiesı.  Alaiaqtar özderınıŋ investisiialyq ūsynystary ülken paida äkeluge kepıldık beretın jaŋa, perspektivaly tehnologiialarmen nemese bıregei naryqtyq mümkındıktermen bailanysty dep jiı aitady.  Būl turaly bilık pen qarjy sarapşylary dabyl qaǧuda. Sondyqtan, memlekette atalmyş jüimen küres qarqyndy.   Biylǧy jyly QR qarjylyq monitoring agenttıgınıŋ yqpalymen  «Qarjy piramidalaryna qarsy ıs-qimyl» arnaiy jobasy ıske qosyldy. Basty maqsat-alaiaqtardyŋ jolyn kesu jäne olarǧa tartylǧan salymşylar sanyn qysqartu. Bıregei joba köp küttırmei öz nätijesınde berude. IT qūraldaryn paidalana otyryp, qarjy piramidalarynyŋ qūrylǧan sätınen bastap, erte anyqtau üşın äleumettık jelılerge taldau jürgızılıp, auditoriiasy 600 myŋ adamdy qamtyǧan, myŋǧa juyq qarjy piramidalarynyŋ belgılerı bar saittar men şottardyŋ sıltemesı būǧattaldy. Jauaptylardyŋ sözıne süiensek, tek soŋǧy alty aida internet jelısınde 36 qarjy piramidasy anyqtaldy. Olar boiynşa «WhatsApp», «Telegram» jäne «Instagram» äleumettık jelılerınde 200 chat anyqtalǧan. Bügıngı taŋda 182 chat būǧattaldy. Osylaişa, 126 myŋ azamattyŋ odan ärı qarjylyq şyǧyndarynyŋ aldy alyndy. 73 myŋ auditoriiasy bar,  «Eolus», «Nisa», «GPIBS», «Dari poluchai», «Charoit», «Carhomi», «Beefre» syndy 7 ırı şeteldık joba boiynşa sotqa deiıngı tergeu bastaldy. «Eolus» qarjylyq  piramidasy boiynşa sot ükımı şyqqan. Qarjy piramidasyn qūrǧany üşın qylmystyq jauapkerşılık közdelgenın jäne mülkı tärkılenıp, 10 jylǧa deiıngı merzımge bas bostandyǧynan aiyrylu jazasy taǧy bar. Piramidalar ädette azamattarǧa joǧary jäne jyldam kırıster turaly uädeler berıp, bıraq ıs jüzınde negızgı paida jaŋadan tartylǧan qatysuşylardyŋ esebınen keledı. Piramidanyŋ qūryǧyna ılıkken jandar asa ülken qarjylyq şyǧynǧa ūşyraidy. Oisyz ärekettıŋ saldarynan san soǧyp qalmas üşın, aldymen kompaniia jaily zerdeleu qajet. Kompaniianyŋ zaŋdylyǧyna erekşe nazar audaru kerek. Qarjy piramidalary zaŋdy biznestıŋ körınısın jasau üşın jalǧan qūjattardy, jalǧan lisenziialardy jäne basqa amaldardy qoldana alady. Aqşany investisiialamas būryn, kompaniiada lisenziialar men basqa da qajettı qūjattardy tekserıŋız. İnvestisiialyq mümkındıkterdı ūsynatyn kez-kelgen kompaniianyŋ tiıstı lisenziialary boluy jäne uäkılettı organdarda tırkeluı kerek. Eger kompaniiada lisenziialar bolmasa nemese kümän tudyrsa, būl jobadan bas tartu qajet. Sondai-aq, kompaniianyŋ täuelsız ūiymdardyŋ oŋ reitingterı bar ekenıne köz jetkızıŋız. Tym jyldam jäne joǧary kırıstı uäde etse, onda küdıktenu kerek. Öitkenı,  qarjy piramidalary köbınese qysqa merzımde şyndyqqa janaspaityn joǧary kırıstı uäde etedı. Kompaniiany zerttep, oǧan qatysty pıkırlerge nazar audaryŋyz. Kez-kelgen kompaniiaǧa nemese investisiialyq jobaǧa aqşa salmas būryn, onyŋ bedelın zertteuge uaqyt bölıŋız. Basqa investorlardyŋ pıkırlerın oqyŋyz jäne keŋes alu üşın qarjy sarapşylaryna habarlasqan abzal. Standartty emes investisiialyq mümkındıkterden saq bolyŋyz. Kriptovaliutaǧa, Forekske jäne basqa standartty emes aktivterge investisiialau öte qauıptı boluy mümkın jäne sızdı qarjylyq şyǧyndarǧa ūşyratuy yqtimal. Qarjylyq keŋesşılermen bailanysyŋyz. İnvestisiia jasamas būryn qarjy jäne investisiia salasyndaǧy mamandarǧa habarlasyŋyz. Olar sızge aqylǧa qonymdy şeşım qabyldauǧa jäne qarjy piramidasynan aulaq boluǧa kömektesedı. Taǧy bır eskeretın jait jobaǧa jaŋa qatysuşylardy tartuǧa basa nazar audaru. Köptegen qarjy piramidalarynda bar qatysuşylardyŋ kırısterı jaŋa qatysuşylardyŋ jarnalaryna tıkelei bailanysty. Alaiaqtar qūrbandaryn dostaryn, tuystaryn jäne tanystaryn belsendı türde tartuǧa yntalandyrady, är jaŋa müşe üşın bonustar uäde etedı. Alaida, zaŋdy investisiialyq jobalarda kırıster jaŋa investorlardy tartuǧa täueldı emes ekenın este ūstaǧan jön. Eger kompaniia öz önımın nemese qyzmetın damytuǧa emes, müşeler jelısın keŋeituge basa nazar audarsa, būl piramidanyŋ belgısı boluy mümkın. Sondai-aq kompaniia qyzmetınıŋ aşyqtyǧyna nazar audaru maŋyzdy. Qarjy piramidasynyŋ kezektı belgısı ol  — aqşany aludyŋ qiyndyǧy. Qarjy piramidalary köbınese aqşa aluǧa jasandy kedergıler tudyrady, būl qatysuşylardy jinaqtaryn jüiede mümkındıgınşe ūzaq qaldyruǧa mäjbür etedı. Zaŋdy investisiialyq jobalarda qarajat alu şarttary ädette naqty körsetılgen jäne qatysuşylar üşın qosymşa qiyndyqtar tuǧyzbaidy. Eger sız aqşaŋyzdy aluǧa tyrysqanda qiyndyqtarǧa tap bolsaŋyz, būl sızdıŋ qarjylyq piramidamen küresıp jatqanyŋyzdyŋ belgısı boluy mümkın. Qarjy piramidalary jaŋa qatysuşylardy tartu üşın äleumettık jelıler men messendjerlerdı qoldana otyryp, köbınese onlain rejimınde jūmys ısteitının ūmytpaŋyz. İnternet arqyly keletın ūsynystardan saq bolyŋyz, sondai-aq, kompaniia naqty qarjylyq körsetkışterge emes, bonustar men yntalandyrularǧa nazar audarsa, būlda qauıpten qorǧanu kerek degen belgı. Aqyrynda, qarjy piramidalarynyŋ ömır süru ūzaqtyǧy şekteulı ekenın ūmytpaŋyz. Erte me, keş pe, olar qūlap, qatysuşylardy ülken şyǧynǧa ūşyratady. Alaiaqtar barlyq keŋseler men saittardy jabu arqyly kenetten joǧalyp ketuı nemese uädelerın oryndamai bankrottyq jariialauy mümkın. Qarjylyq piramidalardy anyqtau qyraǧy boludy talap etedı. Eger sız atalǧan belgılerdıŋ bıreuın nemese bırneşeuın baiqasaŋyz, aqşaŋyzdy salmas būryn jetı ret ölşep, bır ret kesıp, baryp şeşımge kelgen dūrys.