Bügın Batys Qazaqstan oblysyndaǧy «Qazaqstan halqyna» qoǧamdyq qorynyŋ qarjysyna salynǧan 100 jaŋa üidıŋ kıltın saltanatty türde tabystau räsımı öttı. Tamyz aiynyŋ basynda taǧy 14 üidıŋ kıltı tabys etılgen bolatyn. Osylaişa Syrym audanynda 114 üi salyndy: Öleŋtı auylynda – 40, Jympityda – 48, Būldyrty auylynda – 25 jäne Közdıqara auylynda 1 üi.
Aita keteiık, jaŋa üiler salynǧan Jympity auylyndaǧy şaǧyn audandardyŋ bırı "Qazaqstan halqyna" degen atauǧa ie boldy.
Batys Qazaqstan oblysynyŋ äkımı Nariman Töreǧaliev pen «Qazaqstan halqyna» qorynyŋ töraǧasy Bolat Jämışev qonys audaruşylardy quanyşty şaramen qūttyqtady.
«Qazaqstan halqyna» qory Prezidenttıŋ tapsyrmasymen qūryldy jäne qiyn-qystau kezeŋınde otandastarymyzǧa jaqyn bolu maŋyzdy missiiasyn jüzege asyrady. Biyl elımızdıŋ bırneşe öŋırı alapat su tasqynynan zardap şekse, endı bügın Syrym audanynda salynǧan jaŋa üilerdıŋ kıltın saltanatty türde tabys etudemız. «Qazaqstan halqyna» qorynyŋ qatysuymen elımızdıŋ 5 öŋırınıŋ 20 eldı mekenınde 627 tūrǧyn üi salynatynyn atap ötkım keledı. Bügıngı künı 257 otbasy qonys toiyn toilap ülgerdı. Bızdıŋ mesenattarymyzdyŋ jäne Batys Qazaqstan oblysy äkımdıgınıŋ, qūrylysşylar men «Qazaqstan halqyna» qorynyŋ bırlesken jūmysynyŋ arqasynda Batys Qazaqstan oblysynda 114 jaŋa üi salyndy», - dedı «Qazaqstan halqyna» qoǧamdyq qorynyŋ töraǧasy Bolat Jämışev.
Batys Qazaqstan oblysynyŋ äkımı Nariman Töreǧaliev qūrylysşylarǧa joǧary jūmys qarqyny üşın jäne tötenşe jaǧdaidyŋ zardaptaryn joiuǧa qoldau körsetkenı üşın "Qazaqstan halqyna" qoryna alǧysyn bıldırıp, jaŋa tūrǧyn üilerdıŋ salynuy su tasqynynan zardap şekkenderdıŋ mäselelerın şeşıp qana qoimai, Syrym audanynyŋ damuyna eleulı üles qosatynyn atap öttı.
"Memleket basşysy su tasqynynan zardap şekken azamattardy barlyq qajettılıkpen qamtamasyz etudı tapsyrdy. Osyǧan bailanysty, bız tabiǧi apatqa ūşyraǧan BQO tūrǧyndarynyŋ baspana men tiıstı aqşalai ötemaqylardy uaqytynda aluy üşın qoldan kelgennıŋ bärın jasaimyz. Būǧan mesenattar men ükımettık emes ūiymdar ülken qoldau körsetude. Batysqazaqstandyqtarǧa arnap atsalysqany üşın «Qazaqstan halqyna» qoǧamdyq qoryna alǧys aitamyn»,- dedı Nariman Töreǧaliev.
Audany 80 şarşy metr tiptık üilerdıŋ qūrylysy qor men BQO äkımdıgı arasynda memorandumǧa qol qoiylǧannan keiın bastaldy. Batys Qazaqstan oblysynyŋ äkımdıgı su basu qaupı joq aumaqtarda jaŋa üiler salu üşın jer telımderın anyqtap, böldı, sondai-aq qajettı injenerlık infraqūrylymdy jürgızudı qamtamasyz ettı. Oblys äkımdıgı jergılıktı qoǧam belsendılerımen bırlesıp jürgızıp jatqan qūrylys jūmystarynyŋ barysy men sapasyn baqylaudy jäne qadaǧalaudy jüzege asyrdy.
Jalpy alǧanda, su tasqynynyŋ zardaptaryn joiu aiasynda «Qazaqstan halqyna» qory Batys Qazaqstan, Atyrau, Soltüstık Qazaqstan, Qostanai jäne Aqmola oblystarynda 627 otbasyna auyldyq jerlerde tūrǧyn üi saluǧa 16,5 milliard teŋgeden astam qarjy böldı.
