Arnaiy komissiia Qaraǧandyda ornalasqan «YDD Corporation» JŞS ferroqorytpa zauytynda bolǧan toptyq jazataiym oqiǧada jūmys beruşınıŋ kınäsın anyqtady. Būl turaly bügın, 23 tamyzda Eŋbek jäne halyqty äleumettık qorǧau ministrlıgı aitty, dep habarlaidy «Adyrna» tılşısı.
«Negızgı kınä jūmys beruşıde ekenın anyqtaldy. Käsıporynda travmatikalyq faktorlardyŋ äserın boldyrmau üşın şūǧyl şaralar tiıstı därejede qabyldanbaǧany, qauıpsız eŋbek jaǧdailary men qyzmetkerlerdıŋ erejelerdı, nūsqaulyqtardy jäne tehnologiialyq tärtıptı saqtauyn baqylau elementterı tiıstı därejede jasalmaǧany belgılı boldy»,—delıngen habarlamada.
Komissiia müşelerı zardap şekkendermen jäne olardyŋ otbasy müşelerımen kezdesıp, qoldanystaǧy zaŋnamaǧa säikes olardyŋ äleumettık qorǧauǧa zaŋdy qūqyǧy tüsındırıldı. Tergeu nätijelerı jäne jinalǧan barlyq materialdar jazataiym oqiǧaǧa kınälı dep tanylǧan adamdardy jauapqa tartu üşın qūqyq qorǧau organdaryna berıledı.
Sondai-aq komissiia «YDD Corporation» JŞS basşylyǧyna apattyŋ sebepterın joiu jäne aldaǧy uaqytta osyndai jaǧdailardyŋ aldyn alu jönınde şaralar keşenın qabyldauǧa qauly ettı.
Eske salaiyq, 20 şıldede Qaraǧandy qalasyndaǧy «YDD Corporation» ferroqorytpa zauytynda tötenşe jaǧdai bolǧan edı. Nätijesınde segız jūmysşy zardap şegıp, olardyŋ törteuı qaza tapty.
