Prezident Qasym-Jomart Toqaev Täjıkstan premer-ministrı Kohir Rasulzodamen kezdestı. Būl turaly bügın, 23 tamyzda Aqordanyŋ baspasöz qyzmetı jazdy, dep habarlaidy «Adyrna» tılşısı.
Äŋgımelesu barysynda prezident qol jetkızılgen uaǧdalastyqtar ekı eldıŋ sanqyrly yqpaldastyǧyn jaŋa deŋgeige şyǧaratynyna senım bıldırdı.
– Keşe jan-jaqty jäne mazmūndy kelıssöz jürgızıldı. Onyŋ nätijesı de köŋılden şyǧady. Biznes-forumdy joǧary deŋgeide ötkızuge qoldau körsetkenıŋız üşın rizaşylyǧymdy bıldıremın. Jalpy qūny 1 millard dollardan asatyn kelısımderge qol qoiyldy. Būl – quantarlyq jait. Bız keşe özara sauda-sattyq kölemın 2 milliard dollarǧa jetkızu üşın bırlesıp jūmys ısteuge kelıstık. Ekı el ükımettı memleketterımız arasyndaǧy sauda ainalymyn ūlǧaituǧa yqpal etetın türlı baǧytty qarastyruy kerek dep oilaimyn, – dedı Qasym-Jomart Kemelūly.
Memleket basşysy elımız Täjıkstanmen syndarly serıktestıktı odan ärı nyǧaituǧa beiıldı ekenın taǧy bır märte rastady.
Öz kezegınde Kohir Rasulzoda Täjıkstanǧa memlekettık saparmen kelgenı üşın Qasym-Jomart Toqaevqa alǧys aityp, keiıngı jyldary ekı el arasyndaǧy yntymaqtastyq jandana tüskenıne toqtaldy.
– Täjıkstan ükımetı Qazaqstanmen yqpaldastyqty tereŋdetuge basymdyq beredı. Sızdıŋ elıŋız bız üşın maŋyzdy sauda serıktes. Ondaǧan jyldar boiy Qazaqstan syrtqy sauda ainalymy boiynşa tūraqty türde negızgı röl atqaryp keledı. Biylǧy bırınşı jartyjyldyqta tauar ainalymy ūlǧaidy. Ösım körsetkışı 20 paiyzǧa juyqtady. Sız ekı el ükımetterıne özara sauda-sattyq kölemın 2 milliard dollarǧa deiın jetkızudı tapsyrdyŋyz. Būl – oryndauǧa bolatyn mındet, – dedı Täjıkstan premer-ministrı.
Qasym-Jomart Toqaev pen Kohir Rasulzoda kelısılgen uaǧdalastyqtardy jüzege asyrudyŋ, sondai-aq öndırıstık kooperasiiadaǧy jäne sauda-ekonomika, kölık-tranzit salalaryndaǧy äleuettı tolyqtai paidalanudyŋ maŋyzdy ekenın atap öttı.
