QR Konstitusiiasy künı merekesın Alaköl audany, Bibaqan auylynyŋ tūrǧyndary quanyşty jaŋalyqpen qarsy aldy. Köpten kütken zamanaui su qūbyry ıske qosylyp, auylǧa taza ärı jaŋa auyz su jüiesı paidalanuǧa berıldı.
«Su - tırşılık közı, jerdıŋ närı» degen dana halqymyz. Bügınde, Memleket basşysynyŋ 2025 jyly Qazaqstan halqyn 100 paiyz taza auyz sumen qamtamasyz etu tapsyrmasyn ıske asyru maqsatynda audan boiynşa 56 eldı-mekennıŋ 48-ı auyz sumen qamtamasyz etılgen. Biylǧy jyly Köktūma, Terektı, Toqjailau, Ekpındı auyldarynda auyz su jüiesınıŋ qūrylys jūmystary bastaldy. Jyl soŋyna deiın eldı-mekenderdı auyz sumen qamtamasyz etu körsetkışın 90 paiyzǧa deiın ūlǧaitudy közdep otyr.
Auyz sudyŋ auylda qoljetımdı bolyp, aulaǧa deiın kırgenıne tūrǧyndar dän riza. Ony halyqtyŋ jyly pıkırı men alǧysqa toly sözınen baiqauǧa bolady.
«Būryn sondy auylymyzda ortalyqtandyrylǧan auyz su jüiesı müldem bolmaǧan. Sudy aulamyzda tūrǧan tūmadan alatynbyz. Baqşa suaryp, sudy köp alsaq tausylyp qalatyn. Sosyn azdap, ünemdep qoldanuǧa mäjbür boldyq. Su azdyǧynan bau-baqşamyz da jaiqalyp öspedı. Biyl mıne auylǧa taza su berıldı. Su taza, ärı jūmsaq. Sudyŋ berılu ekpını de qatty. Jaqsy boldy. Osyndai tūrmystyq jaǧdailarymyz tüzelıp jatsa qandai jaqsy, - deidı auyl tūrǧyny Qapiza Hamitova.
Jüz eluden astam tūrǧyny bar Bibaqan auylyndaǧy auyz su jüiesınıŋ qūrylysy jūmystaryna respublikalyq jäne oblystyq biudjetten 245 mln. teŋge qarajat bölınıp, audandyq tūrǧyn üi kommunaldyq şaruaşylyǧy, jolauşylar kölıgı, avtomobil joldary jäne tūrǧyn üi inspeksiiasy bölımınıŋ tapsyrysy negızınde merdıger «Alaköl Asyl Qūrylys» JŞS-gı sapaly aiaqtady. Jalpy ūzyndyǧy 6 şaqyrymdy qūraityn su jüiesınıŋ bır erekşelıgı – tötenşe jaǧdailardy, ört qauıpsızdıgın aldyn-alu maqsatynda 18 tekşe metrdı qūraityn 6 ört söndıru rezervuary qarastyrylǧan.
Sapaq auyldyq okrugı, Bibaqan auylynda 13 abonent ortalyqtandyrylǧan auyz su jüiesıne qosyldy.
