Qala äkımı Ǧabit Syzdyqbekov pen «Alarko Holding» türık kompaniiasynyŋ prezidentı Iyldyz Umit Nuri «Bozaryq» industriialyq aimaǧynda qyzanaq ösıretın ırı jylyjai keşenınıŋ qūrylys alaŋyna kapsula salu räsımıne qatysty. İnvestisiialyq jobanyŋ qūny 650 million AQŞ dollaryn, onyŋ jalpy aumaǧy 650 gektardy qūraidy.
Jylyjai keşenı jylyna 155 myŋ tonna önım öndıruge qauqarly. Jobanyŋ bırınşı kezeŋı paidalanuǧa berılgennen keiın 2 myŋǧa juyq jūmys orny qūrylyp, tolyq ıske qosylǧanda 5 myŋǧa juyq adam jūmyspen qamtylatyn bolady. Öndırılgen auylşaruaşylyq önımderımen negızınen, qala tūrǧyndary qamtylyp, tauarlar elımızdıŋ özge de aimaqtary men şet memleketterge jöneltıletın bolady.
Qala äkımı Memleket basşysy Qasym-Jomart Toqaevtyŋ investisiia tartu jäne ösımdık şaruaşylyǧynda sudy ünemdeitın ozyq tehnologiialardy engızıp, damytu tapsyrmasyn ıske asyru barysynda būl jobanyŋ rölı zor ekenıne toqtaldy. Äkımdık auqymdy jobalardy jüzege asyryp jatqan investorlarǧa jan-jaqty qoldau körsetuge qaşan da daiyn.
«Jobany jüzege asyru megapolistıŋ azyq-tülık qauıpsızdıgın qamtamasyz etıp, auyl şaruaşylyǧynyŋ tūraqty damuyna jäne baǧanyŋ tūraqtaluyna yqpal etedı», - dedı qala äkımı.
Kompaniia qūrylys uaqytyn qysqartu maqsatynda Şymkentte jylyjai saluǧa arnalǧan konstruksiialardy şyǧaratyn zauyt aşudy közdep otyr. Sonymen qatar, joba aiasynda halyqaralyq standart boiynşa auyl şaruaşylyǧy mamandaryn daiyndaityn mamandandyrylǧan akademiia aşu josparlanuda. Auqymdy jobany jüzege asyru jylyjai şaruaşylyǧyn damytuǧa ǧana emes, azyq-tülık qauıpsızdıgın qamtamasyz etuge, jaŋa öndırısterdı engızuge jäne jaŋa jūmys oryndaryn aşuǧa yqpal etedı.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz