Qyrǧyzstandaǧy «Aq-Jol» baqylau-ötkızu beketınde Qazaqstannan respublikaǧa janar-jaǧarmai tasymaldap kele jatqan alty jol talǧamaityn kölık pen bır avtobus ūstaldy, dep habarlaidy «Adyrna» ūlttyq portaly.
Qyrǧyz Respublikasynyŋ jol qozǧalysy qauıpsızdıgı bas basqarmasy respublika aumaǧynda 16 qazan men 20 qazan aralyǧynda «Qosymşa tehnika» reidınıŋ aiasynda Qazaqstan men Qyrǧyzstan elderı arasyndaǧy «Aq-Jol» ötkızu beketı arqyly ötetın kölık qūraldaryn tekserude.
«Reid barysynda qosymşa janarmai qūiylǧan alty Toyota Land Cruiser jol talǧamaityn kölıgı men bır jolauşylar avtobusy anyqtaldy», - delıngen mälımdemede.Qosymşa sisternany zaŋsyz ornatyp, janarmai tasymaldaǧany üşın körşı elde ıs qozǧaldy. Jinalǧan barlyq materialdar tergeu qyzmetıne jıberılıp, kölıkter aiyppūl tūraǧyna qoiyldy.
