Işkı ıster ministrınıŋ orynbasary İgor Lepeha probasiialyq baqylaudy būzǧany üşın sottalǧan deputat Däulet Tūrlyhanovtyŋ ūly Nūrasyl Bolattyŋ ısıne qatysty pıkır bıldırdı, dep habarlaidy «Adyrna» ūlttyq portaly.
Mäjılıs alaŋynda jurnalister Işkı ıster ministrlıgı basşysynyŋ orynbasarynan probasiialyq baqylaudy qadaǧalauǧa jauapty qyzmetkerlerge qatysty tergeu jürgızıle me dep sūrady.
«Bız būl ıs boiynşa qyzmettık tekseru jürgızdık. Qataŋ şaralar qoldanyldy, bızdıŋ qyzmetkerler jazalandy», - dedı Lepeha.Eske salaiyq, 2024 jyldyŋ mamyr aiynda Nūrasyl Bolat advokat Oleg Chernov pen onyŋ äielı Annany ūryp-soqqany üşın ekı jylǧa bas bostandyǧynan aiyrylǧan edı. Nūrasyl Bolat bas bostandyǧyn şekteu jazasyn ötep, Almaty probasiia qyzmetınıŋ esebınde tūrdy. Oǧan tüngı uaqytta şyǧuǧa şekteu qoiyldy. Alaida, bırer kün būryn Nūrasyl Bolattyŋ toida jürgenı turaly aqparat tarady. Probasiialyq baqylaudy būzu faktısı boiynşa sottaluşyǧa eskertuler berılıp, jazany bas bostandyǧynan aiyru jazasyna auystyru mäselesın şeşu üşın sotqa materialdar daiyndaldy. Esterıŋızge sala keteiık, 2023 jyldyŋ 11 aqpanyna qaraǧan tünı Almatyda Nūrasyl Bolat erlı-zaiypty advokattar Chernova men Dmitrievichtı ūryp-soqqan bolatyn. Keiınırek Tūrlyhanovtyŋ ūly merzımdı qyzmettıŋ qatardaǧy jauyngerı ekenı belgılı boldy jäne ol zaŋgerlerdı ūrǧan jerde bolmauy kerek edı.
