Täuelsızdıgımızdıŋ tıregı - Qazaqstan Respublikasy Konstitusiiasy künı qūtty bolsyn! Osynau aituly kün qarsaŋynda memlekettıgımızdıŋ bas qūjaty Ata Zaŋ qabyldanǧan kündı qalai atap ötken jön degen saual turasynda oi bölıssek.
Halyq būl merekenı «qosymşa demalys beretın kün» nemese «jūmystan syiaqy alatyn kün»,- dep eseptemes üşın ne ısteuımız qajet?
Men bırer jyl Norvegiiada tūrǧanym bar edı. Sol kezde norvegterdıŋ Konstitusiia künın qalai toilaitynyna kuä boldym. Būl elde konstitusiia künı şyn mänınde bükılhalyqtyq merekege ainalǧan. 17-mamyrdy eŋbektegen näresteden eŋkeigen qartqa deiın asyǧa kütıp, şyn nietımen toilaityny syrt közge bırden körınedı.
Būl kün - norvegter üşın mereke taŋnan bastalady. Aulalaryna, balkondaryna özderınıŋ tularyn ılıp, tuǧan-tuys, aǧaiyndarymen alaŋǧa şyǧady. Jäi ǧana şyqpaidy. Özderınıŋ ūlttyq kiımderın kiıp, özderınıŋ norveg ekenıne, täuelsız el ekenıne masattanyp şyǧady. Osy eldı mekendeitın özge ūlt ökılderı de norveg ūlttyq kiımderın kiıp, būl ürdısten qalys qalmaidy. Būl künı Norvegiianyŋ är qalasynyŋ ülken alaŋdarynda türlı paradtar bolady. Balalar parady, äskeriler parady degendei türlenıp kete beredı. Jyl on ekı ai osy elde bolǧan adam Konstitusiia künınıŋ norvegter üşın eŋ aituly kün ekenın toilau masştabyna qarap aŋǧarǧan bolar edı. Ūrpaqtar sabaqtastyǧyn da, naǧyz «Ruhani jaŋǧyrudy» da däp sol künı Norvegiiadan köresız.
Būl merekenıŋ bızdıŋ elde de däl osylai eş jasandylyqsyz toilanǧanyn qalar edım. Elımızdegı är azamat özınıŋ ūltyna, näsılıne, dıni nanym-senımıne qaramai, memleketımızge, Ata Zaŋymyzǧa degen qūrmetın şynaiy körsetıp, merekenı bar nietımen atap ötkenın qalaimyn. Osyndai merekege közı qanyp ösken jas ūrpaq keleşekte öz elınıŋ patrioty bolady emes pe? «Tärbie tal besıkten»,- dep dana halqymyz tegın aitqan joq. Bız jas balanyŋ sana sezımıne kışkentai kezınde osynau säulenı dūrys qūia bılsek, ol erteŋ erjetken kezde özı-aq būl merekenı qalai toilau kerek ekenın bılıp tūrar edı.
Sondyqtan da menıŋşe barşamyz Ata zaŋymyz qabyldanǧan kündı otbasymyzda atap ötudı dästürge ainaldyryp, balalarymyzǧa bügın qandai keremet mereke ekenın tüsındırıp, kök bairaǧymyzdy köterıp, Otanymyzǧa degen qūrmetımızdı körsetkenımız jön dep oilaimyn. Uaqyt öte būl tamaşa dästürge ainalyp keterı sözsız.
Bibigül Jeksenbai, Astana telekanalynyŋ basşysy
"Adyrna" ūlttyq portaly
