Prezident saparynda şyqqan eŋbek. Qazaqşa-moŋǧolşa, moŋǧolşa-qazaqşa sözdık jaryq kördı

29 qazan künı qazaqşa-moŋǧolşa, moŋǧolşa-qazaqşa sözdıkter jaryq kördı, dep habarlaidy "Adyrna" ūlttyq portaly. Ūlanbatyr qalasynda äigılı altaist ǧalym Bazylhan Būqatūly men Türkı akademiiasynyŋ sarapşysy Näpıl Bazylhan qūrastyrǧan "Qazaqşa-moŋǧolşa sözdık" jäne "Moŋǧolşa-qazaqşa sözdık" jaryq kördı. Sözdıkterdıŋ jaryq köruı Qazaqstan basşysy Qasym-Jomart Toqaevtyŋ Moŋǧoliiaǧa memlekettık sapary kezınde jüzege asqan Qazaqstan men Moŋǧoliia arasyndaǧy mädeni jäne ǧylymi yntymaqtastyqtyŋ bır körınısı bolyp tabylady. Būl maŋyzdy eŋbektı jariialauǧa Moŋǧoliia prezidentı Uhnaagiin Hürelsüh tıkelei qoldau körsettı. Qos sözdıktıŋ alǧysözın Moŋǧoliia prezident keŋsesınıŋ basşysy Gombojavyn Zandanşatar jazǧan. Ärqaisysynda şamamen 60 myŋ söz qamtylǧan būl sözdıkter – altaistika, türkologiia, qazaqtanu jäne moŋǧoltanu salalary boiynşa zertteulerge qajettı leksikografiialyq talaptarǧa sai qūrastyrylǧan qūndy ǧylymi eŋbek. Sözdıktı baspaǧa daiyndau ısın ūiymdastyruda Moŋǧoliia prezidentı janyndaǧy Tıl saiasaty ūlttyq keŋesınıŋ jäne resmi ıster basqarmasy jetekşısı, filologiia ǧylymdarynyŋ doktory (PhD) Niamhüügiin Narangerel jetekşılık ettı.