Aqtöbe oblysynda tehnikalyq aqau şyǧyp, janyp ketken tıkūşaq apatyna qatysty jaŋa derekter belgılı boldy, dep habarlaidy “Adyrna” ūlttyq portaly.
Oqiǧa kuägerlerınıŋ aituynşa, ūşqyş äskeri tıkūşaqty qauıpsız jerge qondyrmaq bolǧan. Solai auyldyŋ üstın ainala ūşypty.
Al auyl syrtyna qūlaǧan tıkūşaqty bırınşı bolyp, auyl şaruaşylyq järmeŋkesınen qaitqan äkımdık qyzmetkerlerı baiqaǧan. Märtök audandyq auyl şaruaşylyq bölımınıŋ basşysy Baqytjan Mulkaev oqiǧanyŋ män-jaiyn aityp berdı.
“Bügın audanda auyl şaruaşylyq järmeŋkesı boldy. Qaitar jolda osy oqiǧany kördık. Qasymda audandyq mäslihat töraǧasy boldy. Bırden 112-ge jäne jedel järdem qyzmetıne habar berdık. Ol jerde oilanyp tūratyn uaqyt bolǧan joq. Sebebı tıkūşaqtyŋ qasynda ekı adam jatty. Bıreuı qolyn būlǧady. Şamasy qūlaǧan kezde ışınde bolǧandardy syrtqa laqtyryp jıberse kerek. Kölıktı alysqa tastap, jaiaulap jettık. Bıreuı esın bılmeidı, ekınşısı “Batyr qalyp qoidy” dep söilep jatty. Tıkūşaq janyp jatqandyqtan bızge oǧan kıru mümkındıgı bolmady. Ekeuın süirelep alystatqanda “tars” etıp atyldy. Ekeuınıŋ denesınde küiık joq. Jerge soqqan kezde laqtyryp jıbergen”, - dedı Baqytjan Mulkaev.Oqiǧaǧa kuä bolǧan tūrǧyndar alǧaşynda apat emes, oqu-jattyǧu dep tüsıngenın aitady.
“Auyl tūrǧyndary tıkūşaq basynda auyldyŋ üstınde ainalşyqtap tūrǧanyn aitty. Olar tıkūşaqty auyldyŋ syrtyna qauıpsız jerge aparyp tūr. Basynda bärı būl jaǧdaidy oqu-jattyǧu şaralary dep tüsıngen. Ūşqyştar auylǧa ziian keltırmes üşın qauıpsız jerge şyǧaryp tūr. Sol jerde temır jolǧa da ziian kelmegen. Ūşaqta bolǧan ekı adamnyŋ amandyǧyn tıleimız”, - dedı Baqytjan Mulkaev.
