Kelesı Ūlttyq qūryltai Burabaida ötetın boldy

Kelesı Ūlttyq qūryltai Burabaida ötetın boldy. Būl turaly bügın Auyl şaruaşylyǧy eŋbekkerlerınıŋ bırınşı forumynda prezident Qasym-Jomart Toqaev mälım ettı, dep habarlaidy “Adyrna” ūlttyq portaly. Prezident osy qūryltaida Qazaqstandy odan ärı damytuǧa qatysty tyŋ josparlardy jariia etpek. «Būrynǧy jospardyŋ bärın qazırgı künnıŋ talabyna laiyqtap, tüzetu qajet. Men būǧan deiın reformalar toqtap qalmaitynyn naqty aittym. Öitkenı elımızdı jan-jaqty jaŋǧyrtu ısı üzdıksız jalǧasa beruge tiıs. Aldymyzda auqymdy jūmys tūr. Soǧan sai jaŋa bastamalar men josparlardy jüzege asyramyz. Qazır onyŋ bärı mūqiiat zerdelenıp jatyr. Kelesı jyly halyqqa ūsynatyn bolamyn. Keibır bastamany ädettegıdei Ūlttyq qūryltaida jariialaimyn. Onyŋ kezektı otyrysy Burabaida ötedı. Qalǧanyn Joldauda aitamyn», - dedı Toqaev bügıngı forumda. Onyŋ aituynşa, Ädılettı Qazaqstandy qūru jolynda älı de köp jūmys ısteu qajet. «Ol üşın jalpyūlttyq bıregeilıgımızdıŋ negızın ūdaiy nyǧaityp, memlekettık basqarudyŋ tiımdılıgın arttyryp, ekonomikany däiektı türde damytu kerek. Eldık maqsattarymyzdyŋ kökjiegın köre bılu maŋyzdy. Sonda ǧana aldymyzǧa qoiǧan strategiialyq mındetterdıŋ baǧytynan auytqymaimyz. Bos äŋgımeler men önbes daulardy qumai, bolaşaqqa senımmen qadam basuymyz kerek. Batyl bastamalarymyzdy bırge jüzege asyratynymyzǧa senımdımın», - deidı prezident.